မန္တလေးတိုင်း၊ မြင်းခြံခရိုင်ထွေအုပ်ရုံးမှာ ညစာစားပွဲပြုလုပ်နေစဉ် ဒရုန်းနဲ့ဗုံးကြဲခဲ့ရာ ပစ်မှတ်ကို တိုက်ရိုက် ထိမှန်ခဲ့ကြောင်း သိရပါတယ်။

ဒီဇင်ဘာ (၂၅)ရက်၊ ညနေ (၆)နာရီလောက်မှာ မြင်းခြံခရိုင်ထွေအုပ်ရုံးအတွင်း ညစာစားပွဲပြုလုပ်မယ်ဆိုတဲ့ သတင်းအရ ဒရုန်းနဲ့  (၂)ကြိမ် တိုက်ခိုက်ခဲ့ခြင်းဖြစ်ပြီး စစ်အုပ်စုဝင်တွေ ထိခိုက်မှုရှိခဲ့ကာ ရမ်းသန်းပစ်ခတ်မှု များစွာဖြစ်ခဲ့ပြီးနောက် ညစာစားပွဲပျက်သွားခဲ့ကြောင်း Myingyan District Drone Strike က သတင်း ထုတ်ပြန်ပါတယ်။

မြင်းခြံမြို့ပေါ်ရှိ စစ်တပ်အရာရှိကြီးတစ်ဦးက ညစာစားပွဲ ပြုလုပ်မယ့်အကြောင်း ဖရဲသီးသတင်းပေးမှုအရ သိရတယ်လို့ ဆိုပါတယ်။

အဲဒီတိုက်ခိုက်မှုကို  Myingyan District Drone Strike အမှတ် (၁၈၄၈) ဒရုန်းတပ် ၊ Shar Htoo Waw နည်းပညာ Team 2 ၊ မြင်းခြံခရိုင် အမှတ်-၄ တပ်ရင်း ၊ အမေ့လက်ရုန်း ပြောက်ကျားတပ် နဲ့ မိုရှေဒါယန်အဖွဲ့တို့ ပူးပေါင်းလုပ်ဆောင်ခဲ့ကြခြင်း ဖြစ်ပါတယ်။

ဒီဇင်ဘာ (၂၄)ရက်က မြင်းခြံမြို့နယ်၊ ကျားကိုင်းရွာ စစ်တပ်ယာယီစခန်းနဲ့ ဒီဇင်ဘာ (၂၃)ရက်မှာ ကျောက်ကန် ရွာက ပျူစောထီးတစ်ဦးရဲ့ နေအိမ်တို့ကိုလည်း ဒရုန်းနဲ့ဗုံးကြဲခဲ့ရာ စစ်သား (၂)ဦး သေပြီး (၅)ဦး ဒဏ်ရာရရှိကြောင်း Myingyan District Drone Strike ကဆိုပါတယ်။

~~~~~~~~~~~~~ 

ကိုငြိမ်း