လွိုင်လင် အခြေစိုက် အကြမ်းဖက် စစ်ကောင်စီ လက်အောက်ခံ ခမရ (၅၃၀) တပ်မှ စစ်သားတစ်ဦးဟာ သေနတ် ၂ လက်၊ ကျည် ၂၀၀ ကျော်နဲ့ အလင်းဝင်​လာတယ်လို့ ကရင်နီ အမျိုးသားများ ကာကွယ်ရေးတပ်(KNDF)၊ တပ်ရင်း (၂) က ဒီကနေ့ စက်တင်ဘာလ ၁၅ ရက်နေ့မှာ သတင်းထုတ်ပြန်ပါတယ်။

ပြည်သူ့ရင်ခွင် ခိုလှုံလာသူ တပ်သား စိုင်းပြည့်စုံဖြိုးဝေဟာ အသက်(၁၉) နှစ် အရွယ်သာ ရှိသေးပြီး တာဝန်ကျရာ စခန်းမှာ ဒုက္ခမျိုးစုံ ခံစားနေခဲ့ရတာကြောင့် မခံနိုင်တဲ့ အဆုံး စက်တင်ဘာလ ၂ ရက်နေ့ ကင်းတာဝန်ကျနေစဉ်မှာ MA3 (၁) လက်၊ M 79 (၁) လက်၊ 5.56 ကျည် ၂၀၀ ကျော်နဲ့အတူ အကြမ်းဖက် စစ်ကောင်စီ ကယန်းသာယာ စစ်စခန်းကနေ စခန်းစွန့်ခွါ ထွက်ပြေးလာခဲ့တာ လို့ သိရပါတယ်။

လက်ရှိအချိန်မှာ အလင်းဝင်လာတဲ့ တပ်သား စိုင်းပြည့်စုံဖြိုးဝေဟာ ကရင်နီ ပြည်သူ့ရင်ခွင်သို့ ရောက်ရှိနေပြီလို့ KNDF တပ်ရင်း(၂)က ပြောပါတယ်။

အကြမ်းဖက် စစ်တပ်က အာဏာသိမ်းပြီးနောက်ပိုင်းမှာ ကရင်နီပြည်နယ်အတွင်း အလင်းဝင်လာတဲ့ စစ်သား ၁၃၀ ဝန်းကျင်နဲ့ ရဲ ၃၀၀ ကျော် ရှိပြီလို့ သိရပါတယ်။

~~~~

နောင်ဘို