ရခိုင်ပြည်နယ်၊ သံတွဲမြို့နယ်မှာ နောက်ဆုံး ကျန်ရှ်ိနေတဲ့ အကြမ်းဖက် စစ်ကောင်စီ မောင်ရွှေလေး ရေတပ်စခန်းကို အာရက္ခတပ်တော်(AA)က ဒီကနေ့ ဩဂုတ် ၂၈ ရက်မှာ တိုက်ခိုက် သိမ်းယူနိုင်ခဲ့ပြီး သံတွဲတစ်မြို့လုံးကို AA ထိန်းချုပ်နိုင်ခဲ့ပြီလို့ သိရပါတယ်။ 

ပြီးခဲ့တဲ့ ဩဂုတ် ၂၅ ရက်နေ့ကစပြီး အာရက္ခတပ်တော် AA က ရှော့တိုက်ဒုံးတွေနဲ့ ပစ်ခတ်တိုက်ခိုက်ခဲ့တာကြောင့် အကြမ်းဖက် စစ်ကောင်စီ ဗိုလ်မှူးဖြိုးမောင်မောင် အပါအဝင် စစ်သား ၅ ဦး ထိခိုက်သေဆုံးခဲ့တယ်လို့ AA နဲ့ နီးစပ်သူတွေက ပြောပါတယ်။ 

အာရက္ခတပ်တော် AA ရဲ့ ထိုးစစ်ဆင်တိုက်ခိုက်မှုကို မောင်ရွှေလေးရေတပ်စခန်းမှာ အကြမ်းဖက် စစ်ကောင်စီက စစ်သင်္ဘော ၈ စီးနဲ့ ခုခံနေခဲ့တာ ဖြစ်ပြီး ဒီကနေ့မှာတော့ စစ်ကောင်စီ စစ်သားတချို့ အလံဖြူထောင်ပြီး လက်နက်ချ အညံ့ခံခဲ့ကြတယ်လို့ သိရပါတယ်။

မောင်ရွှေလေးရေတပ်ကို အာရက္ခတပ်တော် AA က သိမ်းပိုက်ရရှိကြောင်း တရားဝင် သတင်းထုတ်ပြန်တာ မရှိသေးပေမယ့် စစ်ကောင်စီ ထောက်ခံသူတွေကတော့ လူမှုကွန်ရက်စာမျက်နှာတွေမှာ မောင်ရွှေလေးစခန်းကို လက်လွှတ်လိုက်ရပြီဆိုတာ ရေးသားဖော်ပြနေကြတာ တွေ့ရပါတယ်။

သံတွဲမြို့တွင်းရှိ အကြမ်းဖက် စစ်ကောင်စီစခန်းတွေကို အာရက္ခတပ်တော် AA က ပြီးခဲ့တဲ့ ဧပြီလမှာ စတင်တိုက်ခိုက်ခဲ့တာ ဖြစ်ပြီး မြေပြင်သတင်းတွေကတော့ သံတွဲမြို့ကို AA က အလုံးစုံ ထိန်းချုပ်နိုင်သွားပြီလို့ အတည်ပြုပါတယ်။

“လက်ရှိမှာ ရေထဲမှာရော ကုန်းပေါ်မှာပါ စစ်ကောင်စီ တပ်စွဲထားတဲ့ စခန်းရယ်လို့ သံတွဲမှာ မရှိတော့ပါဘူး။ ပြေးလွှားပုန်းအောင်း နေသူ အနည်းငယ်တော့ ကျန်ကောင်း ကျန်နေနိုင်ပါသေးတယ်။ အဲဒီကောင်တွေကိုလည်း အာရက္ခတပ်တော်က လိုက်ရှင်းနေပါတယ်” လို့ မြေပြင်သတင်းရင်းမြစ်တစ်ခုက သံတွဲမြို့ရဲ့ စစ်ရေးအခြေအနေကို ပြောပြပါတယ်။
~~~~
ဓာတ်ပုံ - ပုံဟောင်းများ

နှင်းမြ