မော်လမြိုင်မြို့ရှိ အကြမ်းဖက် စစ်ကောင်စီ အ​​ရှေ့​တောင်တိုင်းစစ်ဌာနချုပ် (ရတခ)မှာ ဒုစစ်ခေါင်းဆောင် စိုးဝင်း ဦးဆောင်ကာ အထူးစစ်ဆင်​ရေး အစည်းအ​ဝေး ပြုလုပ်​နေတဲ့ အားကစားခန်းမနဲ့ စစ်ရဟတ်ယာဥ်  ၂ စီး ရပ်ထား​တဲ့ ​ကွင်းနေရာတို့ကို ဒီကနေ့ ဧပြီ ၉ ရက် နေ့လယ် ၁ နာရီခွဲဝန်းကျင်မှာ ရှာထူး​ဝေါ် နည်းပညာ တပ်ဖွဲ့ရဲ့ Alpha Bats တပ်ခွဲက ကာမီကာ​ဇေ Fixed Wing Drone တွေနဲ့ ဒုတိယအကြိမ် ထပ်မံတိုက်ခိုက်ခဲ့တယ်လို့ သိရပါတယ်။

“ပထမ ပေါက်ကွဲသံ အကျယ်ကြီးတစ်ချက် ကြားတယ်။ ချက်ချင်းဆိုသလိုပဲ ဆက်တိုက် ပေါက်ကွဲသံတွေ ပစ်ခတ်သံတွေ ထပ်ကြားရတယ်။ ရတခထဲကို ဒရုန်းနဲ့ ချတာလို့ ကြားတာပဲ” လို့ မော်လမြိုင် ဒေသခံ ပြည်သူတစ်ဦးက ပြောပါတယ်။

ဒီတိုက်ခိုက်မှု​ကြောင့် အထူး စစ်ဆင်​ရေး အစည်းအ​ဝေး ပြုလုပ်​နေတဲ့ အကြမ်းဖက် စစ်​​ကောင်စီ ဒု​ခေါင်း​ဆောင် စိုးဝင်း အပါအဝင်၊ ရတခ တိုင်းမှူး၊ တပ်မမှူးများ၊ ဗျူဟာမှူးများနှင့် စစ်ဆင်​ရေး အရာရှိ အကြီးပိုင်းတချို့ ထိခိုက်နိုင်​ချေရှိတယ်လို့ ရှာထူး​ဝေါ် နည်းပညာတပ်ဖွဲ့က ပြောပါတယ်။ 

နောက်ဆုံးရရှိတဲ့သတင်းအရ ဒီတိုက်ခိုက်မှုကြောင့် ရတခထဲမှာ အစည်းအ​ဝေး လုပ်​နေတဲ့ စစ်ဦးစီး ပထမတန်းနဲ့ အထက် စစ်ဗိုလ်ချုပ် ၄ ဦး အပါအဝင် အရာရှိ အရာခံ အကြပ် တပ်သား ၃၀ ​ကျော် ထိခိုက် ဒဏ်ရာရရှိထား​ကြောင်း အတွင်းသတင်းများအရ သိရတယ်လို့ ရှာထူး​ဝေါ်နည်းပညာတပ်ဖွဲ့က ပြောပါတယ်။

ကာမီကာ​ဇေ ဒရုန်းတွေနဲ့ တိုက်ခိုက်မှုမှာ ဒဏ်ရာရ စာရင်းမှာ ဒုဗိုလ်ချုပ်မှူးကြီး စိုးဝင်းနဲ့ ဒုဗိုလ်ချုပ်ကြီးညွန့်ဝင်း​ဆွေတို့ပါ ပါဝင်​နေနိုင်ပြီး ဗိုလ်ချုပ် တစ်ဦး၊ ဗိုလ်မှူးချုပ် တစ်ဦးအပါအဝင် အကြီးပိုင်း ၆ ဦး ပြင်းထန်ဒဏ်ရာ ရရှိကာ ၄င်းတို့ထဲမှ ၃ ဦး ဒီက​နေ့ညမှာ ​သေဆုံးသွားခဲ့ပြီလို့လည်း ဆိုပါတယ်။ 

ဒီတိုက်ခိုက်မှု​ကြောင့် ရဟတ်ယာဥ် ၂ စီးလုံးထိမှန်ခဲ့ပြီး ဘားအံ တပ်မ ၂၂ မှာ ရုံးထိုင်နေတဲ့ ကစထမှူး ညွှန့်ဝင်းဆွေရဲ့ ရဟတ်ယာဉ်လည်း ဘားအံကို ပြန်မရောက်လာသလို၊ လူလည်း ပြန်မရောက်လာတာကြောင့် ထိခိုက်မှုမှာ ၎င်းကိုယ်တိုင်ပါဝင်နိုင်တယ်လို့ သုံးသပ်ပြောဆိုမှုတွေလည်း ရှိနေပါတယ်။

အဆိုပါ ထိခိုက်မှုများနဲ့ပတ်သက်ပြီး အတည်ပြုချက် ရရှိဖို့ ကြိုးပမ်းနေပေမယ့် အခုထိတော့ အတည်ပြုလို့ မရသေးပါဘူး။

ပေါက်ကွဲမှု ဖြစ်ပွါးပြီး နောက်ပိုင်းမှာ ရတခတိုင်းရုံး ​​ရှေ့လမ်းမကို ပိတ်လိုက်ပြီး မော်လမြိုင် လေဆိပ်ဘက်ကိုလည်း စစ်ကားတွေ ထွက်ခွါသွားတာ တွေ့ရတယ်လို့ ရှားထူးဝေါ်က ထုတ်ပြန်တဲ့ သတင်းမှာ ဖော်ပြပါတယ်။ 

ရုပ်သံ - Alpha Bats ရဲဘော်များ ရတခဌာနချုပ်ကို ဒရုန်းနဲ့ တိုက်ခိုက်စဉ် 

~~~~

နှင်းမြ