ကရင် အမျိုးသား အစည်းအရုံး (KNU)၊ ခလယ်လွီထူခရိုင်၊ မူးမြို့နယ်/တပ်ရင်း(၈) ဒေသအတွင်း ဖမ်းဆီးရမိထားတဲ့ မူးယစ်ဆေးဝါးတွေကို ဧပြီလ ၃ ရက်နေ့ မနက် ၉ နာရီအချိန်မှာ မူးယစ်ဆေးဝါး တိုက်ဖျက်ရေး ကော်မတီမှ တာဝန်ရှိသူတွေက မီးရှို့ဖျက်ဆီးခဲ့တယ်လို့ KNU ခလယ်လွီထူခရိုင်၊ သတင်းနှင့် ပြန်ကြားရေးက သတင်းထုတ်ပြန်ပါတယ်။
ဖမ်းဆီးရမိခဲ့တဲ့ မူးယစ်ဆေးဝါးတွေကို KNU မူးမြို့နယ်/တပ်ရင်း(၈) မူးယစ်ဆေးဝါးတိုက်ဖျက်ရေး ကော်မတီ တာဝန်ရှိသူတွေ၊ (KNLA) တပ် ခေါင်းဆောင်တွေနဲ့အတူ ကရင် အမျိုးသား ရဲတပ်ဖွဲ့(KNPF) တာဝန်ရှိ ခေါင်းဆောင်တွေ ဦးစီးပြီး မူးယစ်ဆေးဝါး တိုက်ဖျက်ရေး ခေါင်းစဉ်နဲ့ မီးရှို့ဖျက်ဆီးပစ်ခဲ့တာ ဖြစ်ပါတယ်။
ဖမ်းဆီးရရှိထားတဲ့ မူးယစ်ဆေးဝါးတွေထဲမှာ ဆေးခြောက်နဲ့ ဆေးပြားတွေအပြင် အရက်သေစာတွေလည်း ပါဝင်ခဲ့ပြီး ကာလတန်ကြေး ကျပ်သိန်း ၇၀၀ ကျော် ရှိတယ်လို့ ထုတ်ပြန်ချက်မှာ ဖော်ပြပါတယ်။
လက်ရှိအချိန်မှာ KNU မူးမြို့နယ်၊ တပ်ရင်း(၈) ဒေသအတွင်း မူးယစ်ဆေးဝါးတွေ ဝယ်ယူ၊ ရောင်းချ၊ သုံးစွဲတာတွေကို တင်းကြပ်စွာ ပိတ်ပင်တားပြီး ဖမ်းဆီးရမိတဲ့ မူးယစ်ဆေးဝါးဖြန့်ဖြူး ရောင်းချသူတွေကို ကရင် အမျိုးသား အစည်းအရုံး(KNU) ပြဋ္ဌာန်းထားတဲ့ မူးယစ်ဆေးဝါး အထူး အက်ဥပဒေအရ ထိရောက်စွာ အရေးယူ ဆောင်ရွက်သွားမယ်လို့ သိရပါတယ်။
ဓာတ်ပုံ- ဖမ်းဆီးရမိခဲ့တဲ့ မူးယစ်ဆေးဝါးများအား မီးရှို့ဖျက်ဆီးနေပုံ (KNU)
~~~~
Ngwe Maung Than is an independent media and advocacy group committed to human rights and federal democracy in Myanmar. It publishes news reports, features, commentaries, interviews and analyses on the Nway Oo Revolution, as well as music and literature that reflect and promote human rights, federal democracy, peace, and justice in Myanmar through its digital platforms.
ထုတ်ဝေတဲ့ စာစောင်များကို ပုံမှန် ရယူ ဖတ်ရှုနိုင်ပါသည်။