‘ငါတို့ သံအမတ်၊ ငါတို့ အသံ၊ ငါတို့ရဲ့ ကိုယ်စားလှယ် ဆိုတဲ့ တောင်းဆိုဆန္ဒပြမှုကို ရွာပေါင်းစုံ သပိတ်နဲ့ လောင်းလုံးမြို့နယ်ထဲမှာ ပြုလုပ်ခဲ့ကြပါတယ်။

ဒီနေ့ စက်တင်ဘာ (၁၉)ရက် မနက်မှာ ယင်းမာပင်-ဆားလင်းကြီး ရွာပေါင်းစုံသပိတ်က (၉၁၁)ရက်မြောက်အဖြစ် ဆန္ဒပြချီတက်ရာမှာ ‘ငါတို့ သံအမတ်၊ ငါတို့ အသံ ဗီနိုင်း ကိုင်ဆောင်ခဲ့ကြပါတယ်။

“ပြည်သူ့အစိုးရ NUG အတွက်၊ ကုလ သံအမတ်ကြီး ဦးကျော်မိုးထွန်းအတွက် တရားဝင်မှု အရေးတိုက်ပွဲ (Credential Campaign) ကို ပြည်သူအားလုံးက ဝိုင်းဝန်းကြိုးပမ်း‌၊ ဆင်နွှဲကြဖို့ အချိန်ကျရောက်လာပါပြီ” လို့ ယင်းမာပင်-ဆားလင်းကြီး ရွာပေါင်းစုံသပိတ် ဦးဆောင် ကော်မတီက ဆိုပါတယ်။

စက်တင်ဘာ (၁၈)ရက်နေ့ကလည်း ထားဝယ်ခရိုင် ဒီမိုကရေစီအရေးလှုပ်ရှားမှု သပိတ်ကော်မတီက ဦးဆောင်ပြီး စစ်အာဏာရှင်ဆန့်ကျင်ရေး လူထုသပိတ်လှုပ်ရှားမှုအဖြစ် လောင်းလုံးမြို့နယ်အတွင်း ပြုလုပ်ခဲ့ရာမှာ ကမ္ဘာ့ကုလသမဂ္ဂ အရည်အချင်းစစ်ကော်မတီ (Credential Committee)အစည်းအဝေးကနေ ဦးကျော်မိုးထွန်းကို မြန်မာနိုင်ငံဆိုင်ရာ ကုလသံအမတ်အဖြစ် ဆက်လက်ထားရှိရေး တောင်းဆိုတဲ့အနေနဲ့ “Our Ambassador , Our Voice, Our Representative၊ ငါတို့ သံအမတ်၊ ငါတို့ အသံ၊ ငါတို့ ကိုယ်စားလှယ်” ဘန်နာနဲ့ လှုပ်ရှားခဲ့ပါတယ်။

~~~~~~~~~~~

ကိုထက်