မန္တလေးတိုင်း၊ ငါန်းဇွန်မြို့နယ်အတွင်း စစ်ကြောင်းထိုးနေတဲ့တပ်ကို ဒရုန်းနဲ့ ဗုံးကြဲခဲ့ရာ ၇ ဦးသေဆုံးပြီး ၁၃ ဦး ပြင်းထန်ဒဏ်ရာရခဲ့ကြောင်း သိရပါတယ်။

စက်တင်ဘာ (၁၀)ရက်၊ နေ့ခင်း ၁၂ နာရီကနေ ညနေ ၅ နာရီအထိ ငါန်းဇွန်မြို့နယ်၊ လက်ပံ သာရွာသို့ သွားနေတဲ့ အကြမ်းဖက် စစ်ကြောင်းကို PDF တပ်ဖွဲ့တွေက ဗုံး ၈ လုံး ကြဲချ ခဲ့ခြင်းဖြစ်ကြောင်း ငါန်းဇွန် ပကဖ က သတင်းထုတ်ပြန်ပါတယ်။

“သားကျင်ရွာဆိုတာ သူတို့အခြေစိုက်စခန်းရှိတယ်။ အဲစခန်းကို စစ်သားအလောင်းတွေနဲ့ ဒဏ်ရာရသူတွေ ပြန်တင်သွားတာ။ သူတို့သွားတဲ့ လမ်းတစ်လျှောက် ပစ်မှတ်ငြိမ်တဲ့အချိန်မှာ ဗုံးချတာ။ ဒဏ်ရာရတဲ့အထဲက နောက်ထပ် သေနိုင်ခြေရှိပေမဲ့ ဒီမနက်အထိ အတိအကျ မသိရသေးဘူး”လို့ မြင်းမူ PDF ရဲ ဘော်တစ်ဦးက ပြောပါတယ်။

သေဆုံးနဲ့ဒဏ်ရာရ စစ်သားတွေကို ထော်လာဂျီ ၂ စီးနဲ့ သားကျင်ရွာကို ပြန်သယ်သွားကြောင်း ငါန်းဇွန်ပကဖ က ဆိုပါတယ်။

အဲဒီတိုက်ခိုက်မှုကို  ငါန်းဇွန် ပကဖ၊ T.G.R people defence force မြောင်မြို့နယ် T.G.Rပြည်သူ့ကာကွယ်ရေးတပ်ဖွဲ့၊ T.G.R Women Drone Force၊ Black Eagle Defence Force – MMU၊ Black Eagle Drone force ၊ ကျောက်ဆည်ခရိုင် တပ်ရင်း ၂၊ ငန်းနက်ပြောက်ကျားအဖွဲ့၊ မီနဂါးပြောက်ကျားအဖွဲ့၊ မြင်းခြံခရိုင်တပ်ရင်း ၇ တပ်ခွဲ ၁၊ ငါန်းဇွန်ပကဖ အဖွဲ့ဝင်တွေဖြစ်တဲ့ 925 ပြောက်ကျားအဖွဲ့၊ TGYR ပြောက်ကျားအဖွဲ့ ဒေါင်းဖိုက်တာပြောက်ကျားအဖွဲ့၊ပြည်တော်ဝင်ပြောက်ကျားအဖွဲ့၊ လက်ရုံးပြောက်ကျားအဖွဲ့နဲ့ ဖက်ဒရယ်ညီအကိုပြောက်ကျားအဖွဲ့တို့ပူးပေါင်း လုပ်ဆောင်ခဲ့ကြတာပါ။

~~~~~~~~~~

ကိုငြိမ်း