အာဏာသိမ်း အကြမ်းဖက် စစ်ကောင်စီ ခမရ ၉ တပ်ရင်းမှ သထုံမြို့နယ်ရှိ ကျေးရွာများထဲသို့ မတ်လ ၃၀ ရက်နေ့ ည ၆ နာရီဝန်းကျင်မှာ လက်နက်ကြီး ၃ ကြိမ် ပစ်ခတ်ခဲ့ရာ ချောင်းစောင့်ရွာ အတွင်း လက်နက်ကြီးကျည် ၂ လုံး ကျရောက်ပေါက်ကွဲပြီး အသက် (၁၆)နှစ်ရှိ စောနေလင်း(ကျောကုန်းဒဏ်ရာ)၊ အသက် (၁၃)နှစ်ရှိ စောဖြိုးဖြိုး(ညာဘက်ပေါင်ဒဏ်ရာ)၊ အသက် (၅၆)နှစ်ရှိ ဦးမောင်ထွေး(ညာဘက် တင်ပါးရှပ်ထိဒဏ်ရာ)များ ရရှိခဲ့ပြီးဦးမောင်ထွေးရဲ့နေအိမ် ထိခိုက်ပျက်စီးခဲ့ရတယ်လို့ KNU ဒူးသထူခရိုင်က သတင်းထုတ်ပြန်ပါတယ်။

အလားတူ ခမရ ၉ တပ်ရင်းမှ မတ်လ ၂၇ ရက်နေ့ ည ၂ နာရီခန့်မှာ လက်နက်ကြီး ၅ ကြိမ် ပစ်ခတ်ခဲ့တာကြောင့် သထုံမြို့နယ် ထို့ကော်ကျိုးကျေးရွာသား အသက် (၅၄)နှစ်ရှိ နော်နောရီရဲ့ ညာဘက်နောက်ကျောအား လက်နက်ကြီးကျည်စ ထိမှန်ဒဏ်ရာရရှိခဲ့တယ်လို့ သိရပါတယ်။ 

ဆက်လက်ပြီး မတ်လ ၂၈ ရက်နေ့ မနက် ၁၀ နာရီခွဲဝန်းကျင်မှာ ၎င်းတပ်ရင်းမှပင် လက်နက်ကြီး ၆ လုံး ထပ်မံ ပစ်ခတ်ခဲ့ရာ သထုံမြို့နယ် ထုံးဘိုလေးရွာသား အသက် (၅၇)နှစ်ရှိ တီးပန်းစိန်(ဘယ်ဘက်​ခြေချင်းဝတ်၊ နောက်ကျော)နဲ့ အသက် (၂၃)နှစ်ရှိ နော်ချောတခု(ဘယ်ဘက် ခြေသလုံး၊ ဘယ်ဘက်ဒူးခေါင်း) တို့ကို လက်နက်ကြီး ကျည်စထိမှန် ဒဏ်ရာရရှိခဲ့တယ်လို့ KNU ဒူးသထူခရိုင်က သတင်းမှာ ဖော်ပြပါတယ်။

အာဏာသိမ်း အကြမ်းဖက် စစ်ကောင်စီ တပ်စခန်းများမှ အရပ်သား ပြည်သူများ နေထိုင်ရာ ကျေးရွာများထဲသို့ လက်နက်ကြီးများနဲ့ ရမ်းသမ်း ပစ်ခတ်မှုများကြောင့် သထုံမြို့နယ် အတွင်းရှိ ဒေသခံ ပြည်သူများ ထိတ်လ​န့် စိုးရိမ်ကာ မကြာခဏ အိုးအိမ်စွန့်ခွါ တိမ်းရှောင် နေကြရတယ်လို့ ကေအဲန်ယူ-သထုံမြို့နယ် သတင်းတာဝန်ခံမှ ပြောဆိုကြောင်း KNU ဒူးသထူခရိုင်က သတင်းမှာ ဖော်ပြပါတယ်။

ဓာတ်ပုံ - စစ်ကောင်စီ တပ်မှ လက်နက်ကြီး ပစ်ခတ်မှုကြောင့် အရပ်သားများ ထိခိုက်ဒဏ်ရာ ရရှိမှု (source: KNU ဒူးသထူခရိုင်)

~~~~

သက်ပိုင်ဦး