သထုံခရိုင်၊ ကျိုက်ထိုမြို့နယ်အတွင်း အကြမ်းဖက်စစ်တပ် ရမ်းပစ်တဲ့ လက်နက်ကြီးကျည်ထိမှန်ကာ အမျိုးသမီးတစ်ဦး ဒဏ်ရာရခဲ့ကြောင်း သိရပါတယ်။

ကျိုက်ထိုမြို့နယ်၊ လက်ပံပင်ရွာအခြေစိုက် ခလရ-၂ စခန်းကနေ လက်နက်ကြီးနဲ့ ၂ လုံး ပစ်ခတ်ခဲ့ရာ မဲရုံး လေးရွာနေ တီးစောခူးရဲ့ ခြံဝန်းထဲ ကျရောက်ပေါက်ကွဲခဲ့ပြီး အိမ်ထဲမှာထိုင်နေတဲ့ အသက် ၂၇ နှစ်အရွယ် သမီးဖြစ်သူရဲ့ ဘယ်ဘက်ချိုင်းအောက် လက်နက်ကြီးကျည် ထိမှန်ခဲ့ကြောင်း ကေအဲန်ယူ-ဗဟိုက သတင်း ထုတ်ပြန်ပါတယ်။

“ဘာလို့ပစ်သလဲဆိုတော့ ကျမတို့ပြည်သူတွေအမြင်က PDF တွေ လာတိုက်မှာ ကြောက်တာရော။ပြည်သူတွေကို တမင်ဒုက္ခပေးချင်တာရောပါ။ စစ်သားတွေမှာ ပြည်သူကိုသတ်ချင်စိတ်က အမြဲ ရှိနေတယ်” လို့ ကျိုက်ထိုမြို့ခံ အိမ်ရှင်မတစ်ဦးက ပြောပါတယ်။

ခလရ-၂ တပ်ရင်းဟာ လက်ပံပင်ရွာထိပ်က သင်္ချိုင်းနားမှာ တပ်စွဲထားပြီး မတ်လ ၂၆ ရက်နေ့က အဲဒီစခန်းကနေ လက်နက်ကြီးနဲ့ပစ်ခတ်လို့ ဒေသခံ ၃ ဦး သေဆုံးခဲ့ကြောင်း သိရပါတယ်။

ကျိုက်ထိုအခြေစိုက် တပ်ရင်းတွေနဲ့ ရဲစခန်းတွေက ကျေးရွာတွေထဲ လက်နက်ကြီးနဲ့ပစ်ခတ်မှုများစွာရှိ ပြီး ပြည်သူတွေ သေဆုံးထိခိုက်ခြင်းအပြင် ကျောင်း၊ဆေးရုံ၊ ဘာသာရေးအဆောက်အအုံနဲ့ လူနေအိမ်ထိခိုက်ပျက်စီးမှုများစွာ ရှိနေကြောင်း ကေအဲန်ယူ-ဗဟို ကဆိုပါတယ်။

~~~~~~~~~~ 

ကိုထက်