တနင်္သာရီမြို့နယ်အတွင်း စစ်ကြောင်းထိုးလာတဲ့ အကြမ်းဖက်စစ်တပ်ကို ဒေသတွင်းတော်လှန်ရေး အင်အားစုက စောင့်ဆိုင်းတိုက်ခိုက်ခဲ့ရာ စစ်သား ၅ ဦး သေဆုံးကြောင်း သိရပါတယ်။

နိုဝင်ဘာ ၆ ရက်၊ မွန်းလွဲ ၁၂ နာရီခွဲလောက်က တနင်္သာရီမြို့နယ် ပြည်သူ့ကာကွယ်ရေးပူးပေါင်းစစ်ကြောင်း စစ်ကြောင်း(၁)ဟာ သကျက်ကျေးရွာအုပ်စု၊ ကျွဲထိန်းကုန်းရွာနဲ့ ကဏန်းကွင်းရွာကြားမှာ အကြမ်းဖက်စစ်တပ်နဲ့ ထိတွေ့တိုက်ပွဲဖြစ်ပွားခဲ့ခြင်းဖြစ်ပြီး စစ်သား ၄ ဦးလည်း ဒဏ်ရာရခဲ့ကြောင်း People Defense Organization-Tanintharyi Division က သတင်းထုတ်ပြန်ပါတယ်။

အဲဒီတိုက်ပွဲဟာ ၅ နာရီကျော် ကြာခဲ့ပြီး ၆၀ မမ ဗုံးသီး ၇လုံးနဲ့ MA1 ကျည်အိမ် ၁ ခု လည်း သိမ်းဆည်းရရှိခဲ့ပါတယ်။
“စစ်ကြောင်းလာနေတာ သတင်းကြိုရလို့ ဂွင်ကောင်းကောင်းကနေ စောင့်တိုက်ကြတာ။ အဲဒါကြောင့်လည်း အပေါ်စီးကနေ တိုက်နိုင်ခဲ့တယ်။ ကျနော်တို့ဘက်က ထိတာ နည်းနည်းပါးပါးပါ။ လုံးဝမစိုးရိမ်ရဘူး”လို့ မြိတ်ခရိုင်PDFရဲဘော်တစ်ဦးက ပြောပါတယ်။

ပြည်သူ့ကာကွယ်ရေးပူးပေါင်းစစ်ကြောင်းနဲ့ အတူ တနင်္သာရီမြို့နယ်အခြေစိုက် ကော်သူးလေအာမီ (KTLA) ကလည်း ပူးပေါင်းပါဝင်တိုက်ခိုက်ခဲ့ခြင်းဖြစ်ပြီး PDF ရဲဘော် ၃ ဦး မစိုးရိမ်ရ ဒဏ်ရာရခဲ့ပါတယ်။

တနင်္သာရီမြို့နယ် ပြည်သူ့ကာကွယ်ရေးပူးပေါင်းစစ်ကြောင်း စစ်ကြောင်း(၁)ကို တနင်္သာရီပကဖ၊မြိတ် ပကဖ နဲ့ မြိတ်ခရိုင် တပ်ရင်း(၂) ၊တပ်ခွဲ(၁) တို့ ပူးပေါင်းဖွဲ့စည်းထားခြင်းဖြစ်ပါတယ်။

တနင်္သာရီမြို့နယ်အတွင်း ပြည်သူ့ကာကွယ်ရေးပူးပေါင်းစစ်ကြောင်းနဲ့ မဟာမိတ်တော်လှန်ရေးအဖွဲ့တွေလက်တွဲကာ စစ်ဆင်ရေးတိုးမြှင့်လုပ်ဆောင်သွားမှာဖြစ်လို့ ခရီးသွားပြည်သူတွေနဲ့ ဒေသခံတွေ စစ်ရေးသတိရှိကြဖို့နဲ့ မဟာမိတ်တော်လှန်ရေးအင်အားစုတွေရဲ့ စစ်ရေးလိုအပ်ချက်အရ ထုတ်ပြန်တာတွေကို လိုက်နာဆောင်ရွက်ပေးကြ ဖို့ People Defense Organization-Tanintharyi Division က ဆိုပါတယ်။
~~~~~

ကိုဦး