စစ်ကိုင်းတိုင်း၊ မြင်းမူမြို့နယ်အတွင်း ဆက်ကြေးကောက်နေတဲ့ အကြမ်းဖက် စစ်တပ်ကို ၂ ရက်ဆက်တိုက် ဒရုန်းနဲ့  ၇ ကြိမ် ဗုံးကြဲခဲ့ကြောင်း T.G.R People Defense Force က သတင်းထုတ်ပြန်ပါတယ်။

ဩဂုတ် ၁၆ ရက်နဲ့ ၁၅ ရက်နေ့တို့မှာ မြင်းမူမြို့နယ်၊ ဝမ်းပြည့်ကျေးရွာနဲ့ အလကပ္ပကျေးရွာ ကြား ရေဦးဆီဆိုင်အဟောင်းနားမှာ ခရီးသွားပြည်သူတွေဆီကနေ ဆက်ကြေးကောက်နေတဲ့ စစ်သားတွေကို ဩဂုတ် ၁၅ ရက်၊ နေ့ခင်း ၁၁ နာရီလောက်က ဗုံး ၃ လုံး ကြဲချခဲ့ရာ စစ်သားတွေရဲ့ဘေး ကျရောက်ပေါက်ကွဲခဲ့ကြောင်း သတင်းထုတ်ပြန်ပါတယ်။

“ ၁၅ ရက်နေ့က ဒရုန်းနဲ့ပစ်တာ စစ်သားတွေ ထိတယ်လို့ ဒေသခံတွေဆီက သိရတယ်။ သေသလား၊ ဘယ်လောက်ထိသလဲဆိုတာတော့ အတည်ပြုလို့မရဘူး။ ၁၆ ရက်နေ့ ဒရုန်းနဲ့ ပစ်တဲ့အခြေအနေကိုတော့ မသိဘူး” လို့ မြင်းမူအခြေစိုက် PDF ရဲဘော်တစ်ဦးက ပြောပါတယ်။

စစ်သားတွေရဲ့ သေဆုံး၊ ထိခိုက်မှုအခြေအနေကို မသိရသေးဘူးလို့ T.G.R People Defense Force က ဆိုပါတယ်။ အဲဒီတိုက်ခိုက်မှုကို T.G.R People Defense Force၊ T.G.R Women Drone Force၊ Black Eagle Drone Forceနဲ့ ကျောက်ဆည်ခရိုင်တပ်ရင်း(၂) တို့ ပူးပေါင်းလုပ်ဆောင်ခဲ့ကြတာပါ၊

~~~~~~~~

ကိုငြိမ်း