စစ်ကိုင်းတိုင်း၊ မြင်းမူမြို့နယ်၊ အလ္လကပ္ပကျေးရွာထဲသို့ အကြမ်းဖက်စစ်တပ်က လက်နက်ကြီးနဲ့ ပစ်ခတ်ခဲ့ရာ အဘိုးအိုတစ်ဦး နှလုံးရပ်သေဆုံးသွားကြောင်း သိရပါတယ်။

နိုဝင်ဘာ ၂၃ ရက်၊ ည ၁၀ နာရီလောက်မှာ မြောင်လမ်းခွဲရှိ အကြမ်းဖက်စစ်တပ်အထိုင်စခန်းကနေ အလ္လကပ္ပရွာထဲသို့ လက်နက်ကြီးနဲ့ ၃ ကြိမ်နဲ့ ဒရုန်းနဲ့ ၁ ကြိမ် ပစ်ခတ်ခဲ့ခြင်းဖြစ်ပြီး လက်နက်ကြီး သံကြားကာ အဘိုးအိုသေဆုံးခဲ့ခြင်းဖြစ်ကြောင်း မြင်းမူမြို့နယ်သတင်းမှန်ပြန်ကြားရေးက သတင်းထုတ်ပြန်ပါတယ်။

“အလ္လကပ္ပရွာနဲ့ ဝမ်းပြည့်ရွာကြား မုံရွာ-မန်း အဝေးပြေးလမ်းပေါ်မှာက PDF တွေက မကြာခဏ မိုင်း ဆွဲနေလို့ အဲဒီအငြိုးနဲ့ မဆီမဆိုင် ရွာထဲကို လက်နက်ကြီနဲ့ပစ်တာလည်း ဖြစ်နိုင်တယ်။ ဒါမှမဟုတ်၊ထိချင်ရာ ထိဆိုပြီး ရမ်းပစ်တာလည်း ဖြစ်နိုင်တယ်”လို့ မြင်းမူမြို့ Non CDM ဝန်ထမ်းတစ်ဦးက ပြောပါတယ်။

လက်နက်ကြီးထိမှန်ကာ အလ္လကပ္ပရွာထဲက နွား ၃ ကောင်သေဆုံးခဲ့ကြောင်းလည်း သိရပါတယ်။

ည ၁၁ နာရီလောက်မှာလည်း အလ္လကပ္ပရွာထဲသို့ လက်နက်ကြီးနဲ့ ထပ်ပစ်သေးကြောင်း မြင်းမူမြို့နယ် သတင်းမှန်ပြန်ကြားရေးက ဆိုပါတယ်။
~~~~~

နိုင်ကြီး