ကရင်နီပြည်နယ်၊ ဖားဆောင်းမြို့နယ် အတွင်းမှာ အကြမ်းဖက် စစ်ကောင်စီ အကြမ်းဖက် စစ်ကောင်စီရဲ့ ရိက္ခာသယ်ပို့ စစ်ရဟတ်ယာဉ် ၁စင်းကို မနေ့က မေလ ၆ ရက်နေ့ မနက် ၁၁ နာရီ ၄၅ မိနစ်ဝန်းကျင်မှာ ကရင်နီ တော်လှန်‌ရေး ပူးပေါင်းတပ်တွေက ပစ်ချခဲ့တယ်လို့ သိရပါတယ်။

အကြမ်းဖက် စစ်ကောင်စီ MI 2 အမျိုးအစား တိုက်ခိုက်ရေး ရဟတ်ယာဉ်ကို ကရင်နီ တော်လှန်ရေး ပူးပေါင်းတပ်တွေက ပွိုင့် 8 အမျိုးအစား သေနတ် ၂ လက်နဲ့ ဝိုင်းဝန်း ပစ်ချခဲ့တာ ဖြစ်ပြီး ရဟတ်ယာဉ်မှာ ပွန်ချောင်း အရှေ့ဘက် ဘော်လခဲမြို့နယ် အစပ်မှာ ပျက်ကျခဲ့တာလို့ သိရပါတယ်။

ဒီရဟတ်ယာဉ် ပျက်ကျမှုမှာ ဗိုလ်မှူး ၂ ဦး အပါအဝင် အကြမ်းဖက် စစ်သား ၇ ဦး သေဆုံးကာ ၂ ဦး ဒဏ်ရာရရှိခဲ့တယ်လို့ ကရင်နီ လူမျိုးပေါင်းစုံ ပြည်သူ့ လွတ်မြောက်ရေးတပ်ဦး (ကလလတ-KNPLF) က ပြောပါတယ်။

စစ်ရဟတ်ယာဉ် ပျက်ကျတဲ့ နေရာကို အကြမ်းဖက် စစ်ကောင်စီက လေကြောင်း ပျံသန်းပစ်ကူ ပေးပြီး ရှာဖွေကယ်ဆယ်ရေး လုပ်ဆောင်ကာ ရဟတ်ယာဥ် အပျက်အစီးတွေ၊ သေဆုံးသူတွေရဲ့ ရုပ်အလောင်းတွေနဲ့ ဒဏ်ရာရသူတွေကို လာရောက် ရှင်းလင်းသယ်ဆောင်သွားခဲ့တယ်လို့ သိရပါတယ်။

အဆိုပါ MI 2 တိုက်ခိုက်ရေး ရဟတ်ယာဥ်မှာ ပိုလန်နိုင်ငံ ထုတ်ဖြစ်ပြီး ရဟတ်ယာဥ်ပေါ် လူ ၈ ဦးမှ ၁၀ ဦးအထိ တင်ဆောင် လိုက်ပါနိုင်တယ်လို့ သိရပါတယ်။

ရုပ်သံ - ကရင်နီ တော်လှန်ရေး ရဲဘော်များ စစ်ကောင်စီ ရဟတ်ယာဉ်ကို ပစ်ချနေစဉ် (source: KNPLF ဗျူဟာ (၁))

~~~~

သက်ပိုင်ဦး