ရခိုင်ပြည်နယ်ဘက်မှ ထွက်ပြေးလာတဲ့ အကြမ်းဖက် စစ်ကောင်စီ ခလရ ၆၃ မှ စစ်သား ၂ ဦးနဲ့ ခမရ ၃၄၆ တပ်ရင်းမှ စစ်သား ၄ ဦးတို့ကို မကွေး အခြေစိုက် တော်လှန်ရေး တပ်ဖွဲ့ People's Revolution Alliance (PRA)က အရှင် ဖမ်းဆီးရမိထားတယ်လို့ သိရပါတယ်။

အကြမ်းဖက် စစ်ကောင်စီ ခလရ ၆၃ တပ်ရင်းမှ စစ်သား ၂ ဦးဟာ မတ်လ ၂ ရက်နေ့ကတည်းက တတက ၉ ကနေ ထွက်ပြေးလာတာ ဖြစ်ပြီး မကွေးတိုင်း၊ စေတုတ္တရာမြို့မှာ PRA တပ်ဖွဲ့က ဖမ်းဆီးရမိခဲ့တာ ဖြစ်ပါတယ်။ 

ခမရ ၃၄၆ တပ်ရင်းမှ စစ်သား ၄ ဦးဟာ ဧပြီလ ၁ ရက်နေ့မှာ အနောက်ပိုင်းတိုင်း စစ်ဌာနချုပ် (နပခ)၊ အမ်းမြို့ကနေ ထွက်ပြေးလာတာ ဖြစ်ပြီး မကွေးတိုင်း၊ ငဖဲမြို့နယ်ထဲမှာ အရှင် ဖမ်းမိခဲ့တာလို့ သိရပါတယ်။

ဖမ်းဆီးရမိထားတဲ့ အကြမ်းဖက် စစ်ကောင်စီ စစ်သား ၆ ဦးကို လက်ရှိအချိန်မှာ စုံစမ်းစစ်ဆေးမှုတွေ ပြုလုပ်နေပြီး ၎င်းတို့ ကျူးလွန်ခဲ့တဲ့ ပြစ်မှုတွေပေါ် မူတည်ပြီး အရေးယူ ဆောင်ရွက်သွားဖို့ မိတ်ဖက် တော်လှန်ရေး အင်အားစု ဖြစ်တဲ့ ရက္ခိုင့်တပ်တော် AA ထံကို  လွှဲပြောင်းပေးမယ်လို့ PRA (မကွေး) က ပြောပါတယ်။

ရခိုင်ပြည်နယ်ထဲမှာ ရက္ခိုင့်တပ်တော် AA က အကြမ်းဖက် စစ်ကောင်စီ တပ်စခန်းတွေကို ထိုးစစ်ဆင် တိုက်ခိုက်နေတာကြောင့် နေ့စဉ် တိုက်ပွဲတွေ ပြင်းပြင်းထန်ထန် ဖြစ်ပွါးနေပြီး အထိနာနေတဲ့ အကြမ်းဖက် စစ်ကောင်စီ စစ်သားတွေ တာဝန်ကျရာ တပ်တွေကနေ ထွက်ပြေးမှုတွေ ရှိနေတာ ဖြစ်ပါတယ်။

ဓာတ်ပုံ - PRA (မကွေး)

~~~~

နှင်းမြ