စစ်ကိုင်းတိုင်း၊ အရာတော်မြို့နယ်မှာ စစ်ကြောင်းထိုးလာတဲ့ စစ်တပ်ကို အကြမ်းဖက် စစ်ကောင်စီ တင့်ကားတပ် အမှတ် ၅၀၀၄ ရဲ့  အနောက်တောင်ဘက် ၁ မိုင်ခန့်  အကွာရှိ တူးကန်ဘုရားကျောင်း အနီးမှာ PDF ပူးပေါင်းတပ်တွေက ကြားဖြတ် တိုက်ခိုက်ခဲ့တာကြောင့် အရာရှိအဆင့် ၂ ဦး အပါအဝင် အကြမ်းဖက် စစ်သား ၅ ဦး သေဆုံးခဲ့တယ်လို့ သိရပါတယ်။ 

အကြမ်းဖက် စစ်ကောင်စီ ခလရ ၃၆၉ တပ်ရင်းကနေ အရာတော်မြို့ဘက်ကို ထွက်ခွါလာတဲ့ စစ်သား အင်အား ၅၀ ဝန်းကျင်ရှိ ခြေလျင်စစ်ကြောင်းကို ဖေဖော်ဝါရီ ၂၁ ရက်နေ့ မနက် ၃ နာရီ ဝန်းကျင်မှာ PDF ပူးပေါင်းတပ်တွေက နာရီဝက်နီးပါး ကြားဖြတ်တိုက်ခဲ့တာ ဖြစ်ပါတယ်။

ဒီတိုက်ခိုက်မှုကြောင့် အကြမ်းဖက် စစ်တပ်ဘက်မှ အရာရှိအဆင့် ၂ ဦး အပါအဝင် ရဲတပ်ကြပ် စောမင်းဦးနဲ့ အခြားတပ်သား ၂ ဦး သေဆုံးပြီး စစ်သား ၇ ဦး ဒဏ်ရာ အပြင်းအထန် ရရှိကာ အရာတော်မြို့ ဆေးရုံကြီးမှာ ဆေးကုသမှု ခံယူနေတယ်လို့ Danger Force LPDF အဖွဲ့က ပြောပါတယ်။ 

ဒီတိုက်ပွဲမှာ တော်လှန်ရေး ပူးပေါင်း တပ်များဘက်မှ တပ်ဖွဲ့ ဝင် ၂ ဦး ဒဏ်ရာရရှိခဲ့ပြီး ဆေးကုသမှု ခံယူနေဆဲ ဖြစ်တယ်လို့ သိရပါတယ်။

ဒီတိုက်ခိုက်မှုကို Danger Force LPDF ၊ Special Revolution Force ၊ မိုင်းမင်းသားမြေအောက် ပြောက်ကျားတပ်ဖွဲ့နဲ့ မုံရွာခရိုင်တပ်ရင်း (၂၇) တို့ ပူးပေါင်း လုပ်ဆောင်ခဲ့တာ ဖြစ်ပါတယ်။ 

~~~~

နောင်ဘို