"အယ်လယ် .... အယ်လယ် ၊ မောင်ဧတင်္ဂလေးရဲ့ ညောင်ညိုပင် နတ်နန်းက ပူဇော်ပသပွဲတွေနဲ့ တယ်မြိုင်နေပါကလား"

ရုတ်တရက်ပေါ်လာတဲ့ အသံနဲ့အတူ ဘွားကနဲ ရောက်လာတဲ့ ပခန်းကိုကြီးကျော်က ကျုပ် နတ်နန်းထဲ တန်းဝင်မလာဘဲ လှေကားထစ်ကနေ ညောင်ပင်ခြေရင်းမှာ တည်ခင်းထားတဲ့ ကန်တော့ပွဲတွေကို ငုံ့ကြည့်နေသေးတာရယ်။

 ကျုပ်ကတော့ သူ့ကို လှည့်မကြည့်အား၊ နတ်ဓါတ်ပြားကိုသာ ဆက်ပွတ်နေလေတော့ ကိုကြီးကျော်က နောက်ကနေ အသာရပ် ငုံ့ကြည့်ရင်း

"ဘာတွေများ သဲကြီးမဲကြီးကြည့်နေရတာလဲ၊ ဧတင်္ဂရ"

"ဪ .... ဘုတ်စလိုက် ဥပဒေတော်ကြီးကို လေ့လာနေတာပါဗျာ"

"ဘယ်လို ၊ ဘုတ်စလိုက်ဥပဒေတော်ဟုတ်စ"

"မှန်ပါ့၊ ဒီလိုလေ၊ ကျုပ်တို့ လူ့ဘဝ ၊ ကလေးဘဝတုန်းက ဆော့ကစားရင်း မောလို့ဖြစ်ဖြစ်၊ ဆီးဝမ်းသွားချင်လို့ပဲဖြစ်ဖြစ် ခဏနားချင်ရင် ဘုတ်စလိုက် ခေါ်ရတယ်မို့လား"

"အော် ... အေးအေး ၊ မှတ်မိပြီ၊ မှတ်မိပြီ၊ ခွေးရူးလိုက်တမ်းကစားရင်လည်း ပွဲခဏရပ်ချင်ရင် ဘုတ်စလိုက် ခေါ်ရတယ်လေ၊ မိခါနီးမှ ဘုတ်စလိုက်ခေါ်လို့ ငြင်းကြခုန်ကြနဲ့ ပျော်စရာကြီးကွာ အဟေးဟေးး၊ ဒါနဲ့ ဥပဒေတော်က ဘာလဲဟ"

"ရန်ကုန်မှာ ညမထွက်အရအမိန့်၊ ပုဒ်မ ၁၄၄ ထုတ်ထားတယ်မို့လား၊ အခု နှစ်သစ်ကူးညမှာတော့ အဲ့ဒီဥပဒေကို ဘရိတ်အုပ်ပြီး၊ ညမထွက်ရအမိန့်ကို တညရပ်နားထားမယ်တဲ့၊ ဘုတ်စလိုက်ခေါ်တာပေါ့ဗျာ"

"ဟားဟား၊ ဟုတ်ပေ့ကွာ သရေကြိုးတင်းအောင်ကိုင်ရဲ့ သရေကွင်း ဥပဒေ ၊ ဘုတ်စလိုက်ဥပဒေပဲဟေ့၊ ဒါနဲ့ စောစောက ငါတွေ့ခဲ့တဲ့ ကန်တော့ပွဲက သုံးပွဲတောင်ပါလားဟ၊ ဧတင်္ဂတော့ ထောတာပဲဟေ့"

"အဲ့ဒီကန်တော့ပွဲတွေကြောင့် စိတ်ရှုပ်နေရတာပဲ နောင်‌ရင်းရေ့"

"ဘောက်မဲ့ကြောင့် စိတ်ရှုပ်ရသတုံး၊ မောင်ရင်ပဲ မအလ အာဏာလုပြီးကတည်းက လူတွေ မွဲကုန်လို့ နတ်တွေဆီတောင် ကန်တော့ပွဲ မလာနိုင်လို့ စိတ်ညစ်ရတယ်ဆို"

"ဪ .... အခုဟာက ကန်တော့ပွဲတော့ ၊ ကန်တော့ပွဲ၊ သို့သော်လည်း အပူစာတွေ ဖြစ်နေသကိုးဗျ"

"ဆိုစမ်းပါဦး.... ဘယ်က ဘယ်လို အပူစာဖြစ်"

"ဟို ညာဖက်က ကန်တော့ပွဲက ကျုပ်တို့ ဘုန်းကြီးကျောင်းနဲ့ မျက်စောင်းထိုးတိုက်က ကျောင်းဆရာမ အပျိုကြီးရဲ့ ကန်တော့ပွဲ"

"ဪ .... အေးအေး ၊ သိတယ်၊ သိတယ်၊ အဲ့ဒီဆရာမကို ငါသိတယ်၊ ရပ်ကွက်ထဲက ပြောသံ နားစွန်နာဖျားကြားတာတော့ ဘိုကုန်းဆရာမဆို၊ ဘိုကုန်းရပ်ကွက်ကျောင်းက ဆရာမမို့လားဟ"

"ထပ်သရီး .... ဘယ်ကလာ ၊ ဘိုကုန်းရပ်ကွက် ကျောင်းရမှာလဲ၊ အရင်ကတည်းက စစ်ဗိုလ်တွေနဲ့ ပလူးပလဲနေတဲ့အပြင် CDM လည်း မလုပ်လို့ ရပ်ကွက်က ဗိုလ်ကုန်းဆရာမလို့ ရွဲ့ပြီး နာမည်ပြောင်ပေးထားတာပါဗျာ"

"ဪ ... လက်စသတ်တော့ ဂလိုကိုးး ၊ ဒါနဲ့ နေစမ်းပါဦး ၊ သူက ဘာ့လို့ မင့်ဆီ ကန်တော့ပွဲ လာပေးတာလဲဟ"

"အဲ့ဒါ ပြောတာပေါ့ အပူစာဆိုတာ၊ အခု မအလက ရွေးကောက်ပွဲ လုပ်ဖို့ စိုင်းပြင်းနေပြီမို့လား"

"အင်း .... ဟုတ်တယ်လေ အဲ့ဒါနဲ့ ဒင်းနဲ့ ဘာဆိုင်လို့တုန်း ဧတင်္ဂရ"

"ဆိုင်ပါသော်ကော နောင်ရင်းရယ်၊ မအလက ရွေးကောက်ပွဲ မဲစာရင်း ပြုစုဖို့ တအိမ်တက်ဆင်း စာရင်းကောက်ရမယ်တဲ့၊ မဲစာရင်းကောက်တဲ့ အဖွဲ့ထဲ ဆရာမတွေလည်း ပါရမယ်တဲ့လေ"

"ဟမ် ... အာ့လိုလား"

"အဲ့ဒီတော့ ဆရာမအပျိုကြီး အရင်လို စပ်ဖြီးဖြီး မလုပ်နိုင်တော့ဘူးလေ၊ ဘယ်အချိန် ဘယ်နေရာကနေ ပြည်သူတွေက ဗြင်းလွှတ်မယ်မှန်း မသိတော့ ၊ ကြောက်ဒူးတုန်ပြီး မဲစာရင်းကောက်အဖွဲ့ဝင်ထဲ သူ့အမည်မပါအောင် ကူညီမှိုင်းမတော်မူပါဆိုပြီး ကျုပ်ဆီလာ နားပူနားဆာ တိုက်တာဗျ"

"အမ်မယ် အမ်မယ်၊ ဒင်းက ကျောင်းသားအပြည့်အဝမရှိတဲ့ကျောင်းမှာ ဟီလာတိုက်၊ လစာလိမ်ယူ၊ ကျူရှင်ခိုးသင် ငွေဝင်ကြမ်းနေတုန်းက ဘာမှ မစိုးရွံ့ဘဲ အခု မဲစာ‌ရင်းကောက် လိုက်ရမယ်ဆိုတော့ ကြောက်နေသတဲ့လား"

"ဪ .... နမ်းထားတဲ့ သူ့အခွက်ကြီးကို တမြို့လုံး လှည့်ပြရတော့မှာလေဗျာ၊ ကြောက်မှာပေါ့"

"ဘယ်လို ဘယ်လို"

"ဪ .... Non CDM လုပ်ထားတာကို ပြောတာပါ ၊ ဟဲဟဲ"

"ထားပါတော့ .... ထားပါတော့ ၊ ဒါနဲ့ အလယ်က ကန်တော့ပွဲကရောကွာ"

"အဲ့ဒါကတော့ ပိုးဟပ်ဖြူမရဲ့ ကန်တော့ပွဲ"

"ဟေ .... ပိုးဟပ်ဖြူမဆိုတာက ရပ်ကွက်ဈေးလေးရဲ့ ဘေးအိမ်က ကြက်ခြေနီကလေးမမို့လား"

"မှန်ပါ့ ၊ မှန်ပါ့၊ ကြက်ခြေနီအသင်းထဲဝင်ရင် ဘောလုံးပွဲအစ စတိတ်ရှိုးအဆုံး ဖရီးကြည့်ရတယ်ဆိုတဲ့ မဟာရည်ရွယ်ချက်ကြီးနဲ့ အသင်းထဲ ဝင်ထားပြီး ကိုယ်တိုင်က ရာသီမမှန်လို့ ပိုးဟပ်ဖြူလို ဖြစ်နေတဲ့ ကလေးမ"

"အင်း .... ထားပါတော့၊ သူက လင်လိုချင်လို့ ကန်တော့ပွဲ လာပေးတာလား"

"အမ်မငီး အပျိုကြီး နှပ်ချီး၊  ထပ်လွဲပြန်ပြီ၊ သူလည်း မဲစာရင်းကောက်အဖွဲ့ထဲပါရမှာစိုးလို့ ကြောက်နေတာဗျို့"

"ဟမ်၊ သူတို့လည်း ပါရမှာတဲ့လားဟ၊ နို့ .... နေစမ်းပါဦး၊ လူဦးရေစာရင်းစစ်တဲ့ အလုပ်က လဝက မဟုတ်ဘူးလားဟ၊ လုံခြုံရေးအတွက် ရဲက လိုက်၊ လဝကက စာရင်းယူ၊ ဒါဆို ပြီးနေမင့်ဟာကို"

"နောင်ရင်းကျော်က ပြီးပေမယ့် မအလက ပြီးလို့မရဘူးလေဗျာ၊ အရပ်ဖက်အဖွဲ့အစည်းတွေကို ဓါးစာခံက ခေါ်ကို ခေါ်ရမှာကိုး၊ ဒါမှ အတိုက်အခိုက်ခံရရင် NUG နဲ့ PDF က အရပ်ဖက်အဖွဲ့တွေကိုပါ တိုက်ခိုက်သတ်ဖြတ်နေပါတယ်လို့ နိုင်ငံတကာကြားအောင် ကျုံးအော်လို့ ရမှာကိုး၊ ဟိုမှာတွေ့လား၊ ဘယ်ဖက်က ကန်တော့ပွဲက အရံမီးသတ်ဖိုးချစ်ပေးတဲ့ပွဲ"

"အရံမီးသတ်လည်း ပါတာပဲလားဟ"

"အဲ့လို့ ရပ်ထဲရွာထဲ ဂယောင်ဂယောင် လုပ်နေတဲ့ကောင်တွေကို မအလက ထိပ်ဆုံးကနေကို ဓါးစာခံထားမှာဗျာ" 

"ဟားဟားးးး ၊ ဟုတ်ပေ့ကွာ၊ ဒါ နမ်းခဲ့မိတဲ့ ဒုက္ခ၊ နမ်းမိခဲ့တဲ့ ဒုက္ခကွ၊ Non-CDM တွေတော့ မအလ ဓါးစာခံ လုပ်ပွဲကြီးမှာ အသုံးတော် ခံကြပေရော့ပေါ့ကွာ၊ ဟားဟားးး"

အရေးတော်ပုံအောင်ရမည်။

~~~~

ဒီးဒိုဒီး စိတ်တိုင်းကျသရော်သည်။