ရှမ်းပြည်နယ်မြောက်ပိုင်း၊ နမ့်ခမ်းမြိုနယ်အတွင်းရှိ ရွာ ၂ ရွာကို အကြမ်းဖက်စစ်တပ်က ဂျက်လေယာဉ်နဲ့ ဗုံးကြဲတိုက်ခိုက်ခဲ့ရာ ကလေး ၁ ဦး အပါအဝင် မိသားစုဝင် ၅ ဦးစလုံး သေဆုံးသွားကြောင်း သိရပါတယ်။

နမ့်ခမ်းမြို့နယ်၊ ပန်လော်ကျေးရွာနဲ့ ဟိုနား(ကောင်းကပ်)ကျေးရွာကို ဒီဇင်ဘာလ ၇ ရက်၊ မနက် ၁၂ နာရီခွဲလောက်မှာ စစ်တပ်က ဂျက်လေယာဥ်နဲ့ ပေါင် ၅၀၀ ဗုံး ကြဲချခဲ့ခြင်းဖြစ်ပြီး ဒေသခံ ၄ ဦးလည်း ဒဏ်ရာရကြောင်း သိရပါတယ်။

သေဆုံးသွားသူတွေက လွေးအို (၅နှစ်)၊ မိုင်းယိုင်လေး (၃၅နှစ်)၊ တာဆွေ (၄၆နှစ်)၊ မာခမ်းလီး (အသက် ၅၀)နဲ့ ယားဘာ (၅၆နှစ်) တို့ ဖြစ်ပြီး ဒဏ်ရာရသူတွေထဲ အသက် ၆ နှစ်အရွယ် ကလေးငယ် ၁ ဦးလည်း ပါဝင်ကြောင်း TNLA က သတင်းထုတ်ပြန်ပါတယ်။

ဒဏ်ရာရသူ ၄ ဦးအနက် ၂ ဦးမှာ ပြင်းထန်ဒဏ်ရာရရှိခဲ့ကြောင်းလည်း သိရပါတယ်။

ဆက်လက်ပြီး ဒီဇင်ဘာ ၇ ရက်၊ ည ၁၂ နာရီ လောက်မှာလည်း ပန်လော်ရွာကို စစ်တပ်က ထပ်မံဗုံးကြဲတိုက်ခိုက်ခဲ့ရာ ပြည်သူ့နေအိမ် ၇ လုံး ပျက်စီးခဲ့ကြောင်း သိရပါတယ်။

ဒီဇင်ဘာလ ၆ ရက်၊ မနက် ၆ နာရီလောက်မှာလည်း ကျောက်မဲမြိုနယ်အတွင်းရှိ ခမရ-၅၀၁ နဲ့ ၅၀၂ တပ်စခန်းကနေ လက်နက်ကြီးနဲ့ ပစ်ခတ်ခဲ့ရာ ကျောက်မဲမြို့၊ အောင်မြေသာယာရပ်ကွက် (ငြိမ်းချမ်းရေးကုန်း)အတွင်းသို့ ကျရောက်ပေါက်ကွဲခဲ့ပြီး ပြည်သူ့နေအိမ် ၂ လုံး ထိခိုက်ပျက်စီးခဲ့ကြောင်း TNLA က ဆိုပါတယ်။

၁၀၂၇ စစ်ဆင်ရေးအတွင်း စစ်တပ်က ပြည်သူကိုပစ်မှတ်ထားကာ လက်နက်ကြီးနဲ့ လေကြောင်းအသုံးပြု တိုက်ခိုက်မှုကြောင့် ကလေးငယ် ၁၄ ဦးအပါအဝင် ဒေသခံ ၆၀ ကျော် သေဆုံးခဲ့ပြီး ၁၃၇ ဦး ဒဏ်ရာရရှိခဲ့ကြောင်း TNLA က ထုတ်ပြန်ထားပါတယ်။
~~~~~

ကိုဦး