မကွေးတိုင်း၊ မြိုင်မြို့ပေါ်ရှိ အကြမ်းဖက်စစ်တပ် အထိုင်ချ စစ်ရေးပစ်မှတ် ၃ နေရာကို PDF တို့ ဝင်ရောက် တိုက်ခိုက်ခဲ့ကြောင်း သိရပါတယ်။

ဒီဇင်ဘာ ၆ ရက်၊ မနက် ၈ နာရီလောက်က စစ်တပ်အထိုင်ချထားတဲ့ အမှတ်(၃)စာသင်ကျောင်း၊ ဘူတာရုံနဲ့ ကိုးဆောင်ကျောင်းဂိတ်တို့ကို ဝင်ရောက်တိုက်ခိုက်ခဲ့ခြင်းဖြစ်ပြီး အမှတ်(၃)စာသင်ကျောင်းနဲ့ ဘူတာရုံက စစ်သားတွေ မြိုင်မြို့မရဲစခန်းဘက် ဆုတ်ပြေးသွားကြောင်း Earthquake People's Defence Force က သတင်းထုတ်ပြန်ပါတယ်။

“ဘူတာကို PDF တွေ မီးရှို့တယ်။ မြိုင်ဆေးရုံပေါ် စစ်သား ၁၀ ယောက်ကျော်တယ်။ ရောက်လာတာ။အဲအထဲက ၃ ယောက်သေတယ်လို့ ပြောကြတယ်။ကျန်တာ ဒဏ်ရာရပေါ့။ ဒဏ်ရာရတဲ့ထဲမှာ အသဲအသန်ကောင် ၂ ကောင်လောက်ပါသေးတယ်လို့ ကြားတယ်”လို့ မြိုင်မြို့ခံတစ်ဦးက ပြောပါတယ်။

မြို့တွင်းတိုက်ပွဲမှာ ၄၅ မိနစ်လောက်ကြာပြီး PDF ရဲဘော်တွေ အထိအခိုက်မရှိကြောင်း စစ်သားတွေ သေဆုံးထိခိုက်အခြေအနေကို စုံစမ်းနေဆဲဖြစ်ကြောင်း Earthquake People's Defence Force ကဆိုပါတယ်။

တိုက်ပွဲပြီးဆုံးပြီး ၁ နာရီလောက် အကြာမှာ မြိုင်မြို့ NLD ရုံးနဲ့ တိုက်ပွဲဖြစ်ပွားတဲ့နေရာဝန်းကျင်က ပြည်သူ့နေအိမ်တွေကို စစ်တပ်က မီးရှို့ခဲ့ကြောင်း သိရပါတယ်။

အဲဒီတိုက်ခိုက်မှုကို မြိုင်ပကဖ တပ်ရင်း(၁)၊ မြိုင်ပကဖ တပ်ရင်း(၂) နဲ့ Earthquake People's Defence Force တို့ ပူးပေါင်းလုပ်ဆောင်ခဲ့ကြတာပါ။
~~~~~ 

ကိုဦး