စစ်ကိုင်းတိုင်း၊ ဝက်လက်မြို့နယ်၊ ရွှေပန်းကုံးရဲစခန်းကို ဒေသတွင်းတော်လှန်ရေးတပ်ဖွဲ့တွေက တိုက်ခိုက်ခဲ့ရာမှာ စခန်းမှူးအပါအဝင် ၁၆ ဦးကို ဖမ်းဆီးမိခဲ့ကြောင်း သိရပါတယ်။

ရွှေပန်းကုံးရဲစခန်းကို နိုဝင်ဘာ ၂၁ ရက်က စခန်းသိမ်းတိုက်ပွဲ ဆင်နွှဲနိုင်ခဲ့ပြီး စစ်အုပ်စုဝင် ၃ ဦးသေဆုံးကာ လက်နက်ငယ် ၃၁ လက်၊ ကျည်မျိုးစုံ ၆၄၀၀ ကျော်၊ လက်ပစ်ဗုံး ၃၂ လုံး၊ မိုင်း ၆ လုံး၊ ကျည်အိမ် ၃၈ ခု၊ ကျပ် ၉ သိန်းကျော်နဲ့ ပစ္စည်းအချို့ သိမ်းဆည်းရမိကြောင်း အမှတ် (၁) စစ်ဒေသက ဒီနေ့ သတင်းထုတ်ပြန်ပါတယ်။

စခန်းသိမ်းတိုက်ပွဲအတွင်း အကြမ်းဖက်စစ်တပ်ဘက်က ဂျက်ဖိုက်တာ ၁ စင်းနဲ့ ဗုံးကြဲပစ်ကူခဲ့ပြီး Mi 35 တိုက်ခိုက်ရေးရဟတ်ယာဉ်နဲ့ တည်တောရွာကို ပစ်ခတ်ခဲ့ကြောင်း သိရပါတယ်။

အဲဒီတိုက်ပွဲမှာ တော်လှန်ရေး ရဲဘော် ၁ ဦး ကျဆုံးခဲ့ပါတယ်။ ရွှေပန်းကုံးရွာရဲစခန်း တိုက်ခိုက်မှုကို အမှတ် (၂) ရွှေဘိုခရိုင် ကွပ်ကဲရေးရဲ့ ကွပ်ကဲမှုအောက်ရှိ PDF တပ်ရင်းတွေ၊ ဝက်လက်မြို့နယ် ပကဖ၊ လှတောတိုက်နယ် ပကဖ၊ ရွှေပန်းကုံးတိုက်နယ် ပကဖနဲ့  ရွာသာကြီးတိုက်နယ် ပကဖ တို့က ပူးပေါင်း လုပ်ဆောင်ခဲ့ခြင်းဖြစ်ပါတယ်။

~~~~~~~~~

ကိုလင်း