စစ်ကိုင်းတိုင်းအတွင်းရှိ စစ်အုပ်စုလက်အောက်ခံ ဝန်ထမ်းတွေ အလင်းဝင်ကြဖို့ NUG အစိုးရ၊ ပြည်ထဲရေးနှင့်လူဝင်မှုကြီးကြပ်ရေးဝန်ကြီးဌာနက သတင်းထုတ်ပြန်ပါတယ်။

စစ်ရေးလှုပ်ရှားမှုတွေအတွင်း သိမ်းယူစိုးမိုးရရှိထားတဲ့ စစ်ကိုင်းတိုင်း အတွင်းရှိ မြန်မာနိုင်ငံရဲတပ်ဖွဲ့၊ အထွေထွေအုပ်ချုပ်ရေးဦးစီးဌာန၊ အထူးစုံစမ်းစစ်ဆေးရေးဦးစီးဌာန၊ အကျဉ်းဦးစီးဌာန၊ မီးသတ်ဦးစီးဌာနနဲ့ လူဝင်မှုကြီးကြပ်ရေးဦးစီးဌာနတို့က Non-CDM ဝန်ထမ်းတွေအနေနဲ့ ဌာနဆိုင်ရာ စာရွက်စာတမ်းတွေကို သက်ဆိုင်ရာ မြို့နယ်ပြည်သူ့ အုပ်ချုပ်ရေးအဖွဲ့ထံသို့ စနစ်တကျ အပ်နှံပြီး အမျိုးသားညီညွတ်ရေးအစိုးရ လက်အောက်သို့ အလင်းဝင်ရောက်ကြဖို့ ဆိုပါတယ်။

“Non-CDM ဝန်ထမ်းတွေထဲမှာ စစ်တပ်ကို လုံးဝလက်မခံပေမဲ့ အကြောင်းကြောင်းကြောင့် CDM မလုပ်နိုင်တဲ့ဝန်ထမ်းတွေ အများကြီးရှိတယ်။ သိမ်းလိုက်တဲ့မြို့က ဝန်ထမ်းတွေက PDF အကာအကွယ်ရှိနေတာကြောင့် အလင်းဝင်ရတာလွယ်တယ်။ PDF မသိမ်းထားတဲ့မြို့တွေက Non-CDM တွေကျတော့ စစ်တပ်လက်အောက်မှာနေပြီး CDM လုပ်ဖို့ အခက်အခဲ အများကြီးရှိတယ်။ မိသားစုလိုက် တခြားမြို့ပြောင်း ပြေးဖို့ဆိုတာ လူတိုင်းတတ်နိုင်တာ မဟုတ်ဘူး။ အဲဒီအပေါ်  NUG က သိဖို့လိုပါတယ်” လို့ မုံရွာမြို့ တက်ကြွလှုပ်ရှားသူတစ်ဦးက ပြောပါတယ်။

Non-CDM ဝန်ထမ်းတွေအနေနဲ့ အမျိုးသားညီညွတ်ရေးအစိုးရက ပေးအပ်တဲ့ နောက်ဆုံး အခွင့်အရေးအနေနဲ့  ပြည်သူလူထုဘက်က ရပ်တည်ကြဖို့နဲ့ လိုက်နာဆောင်ရွက်ခြင်း မရှိပါက တည်ဆဲဥပဒေတွေအရ ပြင်းထန်စွာ အရေးယူဆောင်ရွက်ခြင်းကို မလွဲမသွေ ခံယူရမယ်လို့လည်း ဆိုပါတယ်။

~~~~~~~~~ 

ကိုထက်