စစ်ကိုင်းတိုင်း၊ ချောင်းဦးမြို့နယ်အတွင်း PDF တိုက်ခိုက်မှုကြောင့် တောထဲ ဝင်ပြေးကာ ပုန်းနေတဲ့ ပျူစောထီး (၂)ဦးကို သေနတ်တွေနဲ့အတူ ဖမ်းဆီးမိခဲ့ကြောင်း သိရပါတယ်။

နိုဝင်ဘာ (၄)ရက်နေ့က ချောင်းဦးမြို့နယ် မုံရွာ-မန္တလေးလမ်းပိုင်း‌ပေါ် ရှိ စစ်တပ်ဂိတ်စခန်းကို PDF ပူးပေါင်းတပ်ဖွဲ့က ဝင်ရောက်စီးနင်း မီးရှို့ခဲ့ရာ အဲဒီစခန်းကနေ ထွက်ပြေးသွားတဲ့ ပျူစောထီး (၂)ဦးကို သူတို့ကိုင်ဆောင်ထားတဲ့ ကာဘိုင်သေနတ် (၂)လက်နဲ့အတူ ဖမ်းဆီးမိခြင်းဖြစ်ကြောင်း Area 71 PDF Monywa က သတင်းထုတ်ပြန်ပါတယ်။

PDF ပူးပေါင်းတပ်က စစ်တပ်ဂိတ်စခန်းကို ဝင်ရောက်တိုက်ခိုက်ချိန်မှာ ပျူစောထီးတချို့ နီးစပ်ရာတောထဲသို့ ထွက်ပြေးသွားတာ တွေ့ရတာကြောင့် လက်ရဖမ်းဆီးနိုင်ရေးအတွက် အစုအဖွဲ့ (၃)အုပ်စုခွဲကာ  တောနင်းရှာဖွေခဲ့ကြောင်း အခုဖမ်းမိခဲ့တဲ့ပျူစောထီး (၂)ဦးဟာ  စိုက်ခင်းတစ်ခုထဲ  ပုန်းခိုနေခြင်းဖြစ်ကြောင်း သိရပါတယ်။ 

အဲဒီပျူစောထီး (၂)ဦးကို NUG အစိုးရလက်အောက်ခံ ပြည်သူ့အုပ်ချုပ်ရေးအဖွဲ့ထံ လွှဲပြောင်း အပ်နှံလိုက် ကြောင်းလည်း Area71PDF Monywa က ဆိုပါတယ်။

စစ်တပ်ဂိတ်စခန်းတိုက်ခိုက်ရာမှာ စစ်သား (၁၄)ဦး သေဆုံးကာ လက်နက်ခဲယမ်းတွေလည်း သိမ်းဆည်းရ မိခဲ့ပြီး PDF ရဲဘော် (၆)ဦးလည်း ကျဆုံးခဲ့ကြောင်း ချောင်းဦးပကဖ က ထုတ်ပြန်ထားပါတယ်။

~~~~~~~~~~

ကိုထက်