တနင်္သာရီမြို့နယ်၊ ကမ္မလိုင်းရွာအခြေစိုက်၊ ခမရ-၅၅၈ တပ်ရင်းကို ဒရုန်းနဲ့ တိုက်ခိုက်ခဲ့ရာ ပစ်မှတ် တည့်တည့် ကျရောက်ပေါက်ကွဲခဲ့ကြောင်း People Defense Organization –Tanintharyi Division က သတင်းထုတ်ပြန်ပါတယ်။ 

အောက်တိုဘာ ၁၀ ရက်၊ မနက် ၁၁ နာရီမှာ တစ်ကြိမ်၊ မွန်းလွဲ ၃ နာရီခွဲမှာ တစ်ကြိမ် ဒရုန်းနဲ့ တိုက်ခိုက်ခဲ့ခြင်းဖြစ်ပြီး ပစ်မှတ်တည့်တည့် ကျရောက်ခဲ့တာ သေချာပေမဲ့ ခမရ-၅၅၈ တပ်ရင်းအတွင်း သေဆုံး၊ ထိခိုက်အခြေအနေကိုတော့ ဆက်လက်စုံစမ်းနေဆဲပဲလို့ သိရပါတယ်။

“စခ တွေ ဒရုန်းလာလိမ့်မယ်လို့ မမျှော်လင့်ထားဘူး။ တပ်ရင်းထဲဆိုတော့ အသေအပျောက် လိုက်ရတာ ချက်ချင်းမရသေးလို့။ သေချာထိတာတော့ အမှန်အကန်ပဲ။ စခတွေ ပြန်ပြီး ရမ်းပစ်တာကလွဲလို့ ဘာမှ မတတ်နိုင်ဘူး”လို့ မြိတ်ခရိုင်တပ်ရင်း(၂)ရဲ့ PDF ရဲဘော်တစ်ဦးက ပြောပါတယ်။

အကြမ်းဖက်စစ်တပ်က လက်နက်ကြီး၊ လက်နက်ငယ်တွေနဲ့ ပြန်လည်ရမ်းပစ်ပေမဲ့ PDF ရဲဘော်တွေ အထိအခိုက်မရှိဘူးလို့ သိရပါတယ်။

အဲဒီတိုက်ခိုက်မှုကို ကရင်အမျိုးသားလွတ်မြောက်ရေးတပ်မတော် KNLA တပ်ရင်း(၁၁)၊တနင်္သာရီတိုင်းစစ်ဌာန၊ လေ့ကျင့်ရေးနှင့်နည်းပညာဌာနရဲ့ မောင်းသူမဲ့ဒရုန်းတပ်ဖွဲ့(Dragon Squad)၊ မြိတ်ခရိုင် PDFတပ်ရင်း(၂) တပ်ခွဲ(၂)နဲ့ တနင်္သာရီမြို့နယ် ပြည်သူ့ကာကွယ်ရေးပူးပေါင်းအဖွဲ့တို့ ပူးပေါင်း လုပ်ဆောင်ခဲ့တာပါ။ 

~~~~~~~~~~~ 

ကိုထက်