စစ်ကိုင်းတိုင်း၊ ဆားလင်းကြီးမြို့နယ်ကနေ ပုလဲမြို့နယ်အတွင်း စစ်ကြောင်းထိုး ဝင်ရောက်လာတဲ့ အကြမ်းဖက် စစ်ကောင်စီတပ်ကို  ABSDF နဲ့ တော်လှန်ရေး ပူးပေါင်း တပ်ဖွဲ့တွေက အောက်တိုဘာလ ၆ ရက်နေ့ နေ့လည် ၃ နာရီဝန်းကျင်မှာ ကြားဖြတ်စောင့်ကြို တိုက်ခိုက်ခဲ့ပါတယ်။

ဆာလင်းကြီးမြို့နယ်ကနေ ထွက်ခွါလာတဲ့ ယာဉ် ၁၈ စီး ပါ စစ်ကောင်စီ ယာဉ်တန်းမှာ လုံခြုံရေးယူဖို့ လိုက်ပါလာတဲ့ အကြမ်းဖက် စစ်သားတွေကို ABSDF အမှတ်(၁၄) တပ်ရင်း၊ ရဲခေါင်ပြောက်ကျားတပ်ဖွဲ့ ၊ ဗမာ့ လွတ်မြောက်ရေး ဒီမိုကရက်တစ် တပ်ဦး (BLDF)နဲ့ ပုလဲမြို့နယ် ပြည်သူ့ ကာကွယ်ရေး အဖွဲ့တွေ ပူးပေါင်းကာ စပါးစေ့ကျေးရွာ အရှေ့ဘက်မှာ စောင့်ကြို တိုက်ခိုက်ခဲ့ကြတာလို့ ABSDF Column 3 က သတင်း ထုတ်ပြန်ထားပါတယ်။

ဒီတိုက်ခိုက်မှုကြောင့် အကြမ်းဖက် စစ်ကောင်စီ စစ်သား ၆ ဦး ထက်မနည်း ထိခိုက်ဒဏ်ရာရရှိခဲ့ပြီး တိုက်ပွဲအပြီးမှာ အကြမ်းဖက် စစ်ကောင်စီတပ်ဘက်က လက်နက်ကြီးတွေနဲ့ စပါးစေ့ကျေးရွာ အနီးဝန်းကျင်ကို ရမ်းသမ်းပစ်ခတ်ခဲ့တယ်လို့ သိရပါတယ်။

အလားတူ မကွေးတိုင်း၊ ဂန့်ဂေါမြို့နယ်၊ ရှိ အကြမ်းဖက် စစ်ကောင်စီ လက်အောက်ခံ တောင်ခင်ရန်း နယ်မြေရဲကင်းစခန်းကို တော်လှန်ရေး ပူးပေါင်းတပ်ဖွဲ့တွေက မနေ့က အောက်တိုဘာ ၇ ရက်နေ့ မနက်ပိုင်းမှာ ပစ်ခတ် တိုက်ခိုက်ခဲ့တယ်လို့ သိရပါတယ်။

"တောင်ခင်ရန်း ရဲစခန်းထဲမှာ ကတုတ်ကျင်းတူးနေတဲ့ စစ်ကောင်စီ လက်အောက်ခံ ရဲတွေကို သွားရောက် ပစ်ခတ်ခဲ့တာပါ၊ ရဲ တစ်ယောက်သေတယ်" လို့ ABSDF Column-3 သတင်းနဲ့ပြန်ကြားရေး တာဝန်ရှိသူက ပြောပါတယ်။

သေဆုံးသွားတဲ့ အကြမ်းဖက် စစ်ကောင်စီ ရဲကို ကတုတ်ကျင်း တူးနေတဲ့ နေရာကနေ တောင်ခရန်းရဲစခန်းကို ပြန်လည် သယ်ယူသွားတယ်လို့ သိရပါတယ်။

ဒီပစ်ခတ် တိုက်ခိုက်မှုကို ဂန့်ဂေါခရိုင် PDF တပ်ရင်း၊ ပ.က.ဖ တွေနဲ့ ABSDF အဖွဲ့တို့ ပူးပေါင်းခဲ့တာ ဖြစ်ပါတယ်။

~~~~~~~~~~ 

နှင်းမြ