ကရင်အမျိုးသား အစည်းအရုံး (KNU) - ကော်သူးလေ အုပ်ချုပ်နယ်မြေ၊ ဒူးပလာယာခရိုင်၊ နို့တကောမြို့နယ်၊ ထီးသဘျုခီး ကျေးရွာရှိ ခရစ်ယာန် ဘုရားရှိခိုးကျောင်းကို မနေ့က အောက်တိုဘာ ၄ ရက် မနက် ၁၁ နာရီ ၂၅ မိနစ်မှာ အာဏာသိမ်း အကြမ်းဖက် စစ်ကောင်စီတပ်က Yak - 130 Jet Fighter တစ်စီးနဲ့ ပေါင် ၅၀၀ ဗုံးသီးတစ်လုံး ကြဲချတိုက်ခိုက်ခဲ့ပါတယ်။

အဆိုပါ ဗုံးသီးမှာ ပေါက်ကွဲခဲ့ခြင်း မရှိဘဲ အလုံးလိုက် ပြုတ်ကျခဲ့တာကြောင့် ဘုရားကျောင်း သွပ်မိုးနဲ့ ဘေးအကာ မှန်သားတချို့ ထိမှန်ပျက်စီးခဲ့တယ်လို့ ဒူးပလာယာခရိုင် - သတင်းနှင့် ပြန်ကြားရေးက ဒီကနေ့ သတင်းထုတ်ပြန်ပါတယ်။

KNU ဒူးပလာယာခရိုင်၊ နို့တကောမြို့နယ်၊ ထီးသဘျုခီး ကျေးရွာ အနီးရှိ အကြမ်းဖက် စစ်ကောင်စီ ကွီလုံးတိုင် တပ်စခန်းသို့ ပစ္စည်းတွေ လာရောက်ပို့ဆောင်စဉ် Mi - 35P Attack Helicopter တစ်စီးနဲ့ ၎င်းတပ်စခန်း အနီး ပတ်ဝန်းကျင်ကို လှည့်ပတ် ပျံသန်း ပစ်ခတ်ခဲ့ပြီး Yak - 130 Jet Fighter တစ်စီးနဲ့ခရစ်ယာန် ဘုရားရှိခိုးကျောင်းကို ပေါင် (၅၀၀) ဗုံးသီး တစ်လုံး ကြဲချတိုက်ခိုက်ခဲ့တာ ဖြစ်ပါတယ်။

ယင်းသို့ ပစ်ခတ်နေစဉ်မှာ Mi - 17 Transport Helicopter တစ်စီးနဲ့ ကွီလုံတိုင် တပ်စခန်းထဲသို့ ပစ္စည်းအထုပ်အပိုးများကို လေထီးများနဲ့ ပစ်ချပေးခဲ့တယ်လို့ သိရပါတယ်။

ပစ္စည်းများအား လာရောက်ပို့ဆောင်နိုင်ရန် မော်လမြိုင် ရတခ မှ Mi - 35P Attack Helicopter တစ်စီးဖြင့် ၎င်းတပ်စခန်းအနီး တစ်ဝိုက် ပတ်ဝန်းကျင်များအား နယ်မြေ လုံခြုံရေး နှင့် ရှင်းလင်းရေးအဖြင့် လှည့်ပတ် ပျံသန်း ပစ်ခတ်ခဲ့ပြီး နေပြည်တော်တက် Yak - 130 Jet Fighter တစ်စီးမှလည်း ကွီးလုံးတိုင် စခန်းအနီးရှိ ထီးသဘျုခီး ကျေးရွာမှ ခရစ်ယာန် ဘုရားရှိခိုးကျောင်းအား ပေါင် (၅၀၀) ဗုံးသီး တစ်လုံးဖြင့် သွားရောက် ပစ်ချခဲ့သည်။

အလားတူ အောက်တိုဘာလ ၃ ရက်နေ့မှာလည်း မော်လမြိုင် အရှေ့တောင်တိုင်း စစ်ဌာနချုပ်မှ Mi - 35P Attack Helicopter တစ်စီး၊ Mi - 17 Transport Helicopter တစ်စီးတို့ဖြင့် KNU - ဒူးပလာယာခရိုင်နယ်မြေ အတွင်းသို့ တစ်ရက်အတွင်း ၃ ကြိမ်တိုင်တိုင် လာရောက်ကာ စစ်သားတချို့နဲ့ ကုန်ပစ္စည်းများကို ပို့ဆောင်ခဲ့တယ်လို့ သိရပါတယ်။

ပထမ အကြိမ်အဖြစ် KNU - ဒူးပလာယာခရိုင်၊ နို့တကောမြို့နယ်၊ ကြာအင်းဆိပ်ကြီးမြို့ရှိ အာဏာသိမ်း အကြမ်းဖက် စစ်ကောင်စီ အ​ခြေစိုက် ဗျူဟာသို့ တပ်မမှူး မျိုးဆက်အောင်၊ တပ်သားအချို့နဲ့ စစ်သားလစာများကို Mi - 17 Transport Helicopter တစ်စီးဖြင့် မနက် ၁၁ နာရီအချိန်မှာ လာရောက်ပို့ဆောင်ပေးခဲ့ပြီး Mi - 35P Attack Helicopter တစ်စီးကလည့်ပတ် ပျံသန်း လုံခြုံရေး ယူပေးခဲ့တယ်လို့ သိရပါတယ်။

ဒုတိယ အကြိမ်အဖြစ် မနက် ၁၁ နာရီ မိနစ် ၂၀ အချိန်မှာ KNU - ဒူးပလာယာခရိုင်၊ ကော့ကရိတ်မြို့နယ်၊ ကျိုက်ဒုံမြို့ အခြေစိုက် စစ်စခန်းသို့ ဗျူဟာမှူး အသစ် အောင်ကျော်စိုးနဲ့ စစ်သား ၁၀ ဦးကို အထက်ပါနည်းလမ်းအတိုင်း ရဟတ်ယာဉ် ၂ စီး အသုံးပြုပြီး ပို့ဆောင်ပေးခဲ့တာ ဖြစ်ပါတယ်။

အလားတူ KNU - ဒူးပလာယာခရိုင် ဝင်းရေးမြို့နယ် ဘုရားသုံးဆူမြို့ အခြေစိုက် အကြမ်းဖက် စစ်ကောင်စီ ပင်မကုန်း စစ်စခန်းသို့ တပ်သား ၁၂ ဦးကို ယင်းနေ့ နေ့လည် ၁ နာရီ ၅၇ မိနစ်မှာ အထက်ပါ နည်းလမ်းအတိုင်း ရဟတ်ယာဉ် ၂ စီး အသုံးပြုပြီး ပို့ဆောင်ပေးခဲ့တာ ဖြစ်ပါတယ်။

~~~~~~~~~ 

နှင်းမြ