မကွေးတိုင်း၊ ပခုက္ကူကနေ မြိုင်သို့ ဝင်လာတဲ့ ခြေလျင်စစ်ကြောင်းကို ဒရုန်းနဲ့ ဗုံး (၄၅)လုံး ကြဲချခဲ့ကြောင်း မြိုင်ပကဖ က သတင်းထုတ်ပြန်ပါတယ်။

စက်တင်ဘာ (၂၈)ရက်၊ မနက် (၉)နာရီကျော်ကစပြီး ပခုက္ကူကနေဝင်လာတဲ့ ခြေလျင် စစ်ကြောင်း မြိုင်မြို့ နယ်၊ ညောင်တွင်းအရှေ့ရွာအရောက်မှာ ဗုံးကြဲခဲ့ခြင်းဖြစ်ပြီး စစ်သား (၆)ဦး ဒဏ်ရာရခဲ့ကြောင်း သိရပါတယ်။

ဒဏ်ရာရ စစ်သားတွေကို ညနေ (၃)နာရီ၊ မိနစ်(၅၀)လောက်မှာ ပခုက္ကူဆေးရုံသို့ ကားနဲ့ ပို့ဆောင်လိုက်ကြောင်း မြိုင်ပကဖ က သတင်းထုတ်ပြန်ပါတယ်။

“ကျနော်တို့ဆေးရုံသတင်းအရတော့ ထိတဲ့ (၆)ကောင်မှာ (၅)ကောင်ကတော့ ပင်စင်စား စာအုပ်ရောင်း ဘဝရောက်မယ် ကြားတယ်” လို့ ပခုက္ကူ PDF ထောက်ပို့တစ်ဦးက ပြောပါတယ်။

စက်တင်ဘာ (၂၈)ရက်၊ ညနေ (၅)နာရီ၊ (၁၅)မိနစ်ကလည်း ပခုက္ကူ တပ်မ-၁၀၁ ကနေ ထွက်လာတဲ့ စစ်ကား (၆၀)လောက်ကို ပခုက္ကူ-ကမ္မ လမ်းပိုင်းတစ်နေရာမှာ မြိုင်ပကဖ နဲ့ Black Cobra PKU တို့မိုင်းဆွဲခဲ့ရာ ကားတစ်စီးရပ်သွားကာ ကျန်ကားတွေလည်း ဆက်လက် ထွက်ခွာနိုင်ခြင်း မရှိတော့ကြောင်း အဲဒီစစ်ကြောင်းက လက်နက်ကြီး၊ ငယ်တွေနဲ့ ရမ်းသန်းပစ်ခတ်နေတာကြောင့် ပခုက္ကူနဲ့  ကမ္မကြားလမ်းဘေးအနီးရှိ ကျေးရွာတွေက ပြည်သူတွေ ထွက်ပြေးကြရကြောင်း မြိုင်ပကဖ ကဆိုပါတယ်။

ကိုထိုက်