စစ်ကိုင်းတိုင်း၊ ဒီပဲယင်းမြို့အဝင်မှာ ကင်းပတ်ထွက်လာတဲ့ စစ်တပ်ကို PDF တွေက စောင့်ဆိုင်း ပစ်ခတ်ခဲ့ရာ ၄ ဦး ပွဲချင်းပြီးသေဆုံးပြီး သေနတ် ၄ လက် သိမ်းဆည်းရမိခဲ့ကြောင်း သိရပါတယ်။

ဒီပဲယင်းမြို့အဝင်၊ ကသစ်အိမ်ဂိတ်က စစ်သား (၅)ဦး ပြီးခဲ့တဲ့ရက်ပိုင်းအတွင်း ည ၁၂ နာရီ မိနစ် ၄၀ လောက်မှာ မြို့အဝင် စိန်ပန်းပင်တံတားဘက် ကင်းပတ်ထွက်လာစဉ် PDF တွေက ကင်းပုန်းဝပ်ပြီး ပစ်ခတ်ခဲ့ခြင်းဖြစ်ကြောင်း Yan Gyi Aung People Defense Forceက ယမန်နေ့ညက သတင်းထုတ်ပြန်ပါတယ်။

“ PDF တွေက ဒီကောင်တွေ ဒီအချိန် ကင်းပတ်မှန်းသတင်းသေချာရလို့ အေးဆေး စောင့်ပစ်သွားတာ။ စစ်တပ်က စစ်သားသေတာ မနှမြောဘူး။ သေနတ်၄လက် PDF ရသွား တာရင်ထုမနာဖြစ်နေတာ”လို့ ဒီပဲယင်းစစ်ရှောင်ကူညီနေသူတစ်ဦးက ပြောပါတယ်။

စစ်သား (၅)ဦးအနက် (၁)ဦးမှာ ချောင်းထဲသို့ ခုန်ချထွက်ပြေးသွားကြောင်း သိရပါတယ်။

စစ်သား (၄)ဦး ဆီကနေ MA-1 တစ်လက် ၊ G3 တစ်လက် ၊ ကာဘိုင်တစ်လက် ၊ M79 ၄၀(မမ)တစ်လက်နဲ့ ၄၀ မမဗုံးသီး ၄ လုံး သိမ်းဆည်းမိခဲ့ပါတယ်။

အဲဒီတိုက်ခိုက်မှုကို Yan Gyi Aung People Defense Force ၊ အဖြူရောင် ပကဖ၊ ညောင်ဉီးခရိုင်တပ်ရင်း(၅)၊ ပုဂံပြည်ဘီလူးတပ်နဲ့ဖက်ဒရယ်စစ်ကြောင်း (၁)တို့မှ ပူးပေါင်းလုပ်ဆောင်ခဲ့ခြင်းဖြစ်ပြီး Yan Gyi Aung People Defense Force ရဲ့ ဒုတိယ‌ခေါင်းဆောင် ခြေသလုံးကျည်ထိမှန် ဒဏ်ရာရခဲ့ပါတယ်။

~~~~~~~~~~

ကိုငြိမ်း