ပဲခူးတိုင်း၊ ကျောက်ကြီးမြို့နယ်(လယ်ဒို)အတွင်း အကြမ်းဖက် စစ်တပ်ရဲ့ လေကြောင်း တိုက်ခိုက်မှုကြောင့် ဒေသခံ ၇၀၀ နီးပါး ထွက်ပြေးတိမ်းရှောင်နေရကြောင်း သိရပါတယ်။

အကြမ်းဖက် စစ်တပ်ဟာ ကျောက်ကြီးမြို့နယ်(လယ်ဒို)၊ လော်မူသောရွာနဲ့ ဘုရားလေး ကုန်းဘုန်းကြီး ကျောင်းအနီးသို့ စက်တင်ဘာ (၅)ရက်၊ မနက် ၈ နာရီ မိနစ် ၅၀ လောက်မှာ လေကြောင်းကနေ ဗုံးကြဲခဲ့တာကြောင့် အိမ်တစ်လုံးပျက်စီးကာ ဘုန်းကြီးကျောင်းလည်း အနည်းငယ်ပျက်စီးခဲ့ကြောင်း ကေအဲန်ယူ-ဗဟိုက သတင်းထုတ်ပြန်ပါတယ်။

ယင်းတိုက်ခိုက်မှုကြောင့် အိမ် ၁၄၉ လုံးရှိပြီး ဒေသခံ ၆၃၂ ဦးနေထိုင်တဲ့ လော်မူသောရွာနဲ့ လော်မူပယ်ကျေးရွာတို့က ဒေသခံတွေ ထွက်ပြေးနေကြရပါတယ်။

ကျောင်းသား ၂၇၂ ဦး တက်ရောက်နေတဲ့ လော်မူသောအထက်တန်းကျောင်းနဲ့ ကျောင်းသား ၃၃ ဦး တက်ရောက်နေတဲ့ လော်မူပယ်မူလတန်းကျောင်းတို့ကိုလည်း လေကြောင်းရန်ကြောင့် ယာယီပိတ်ထားရကြောင်း ကေအဲန်ယူ-ဗဟိုက ဆိုပါတယ်။

မိုးတွင်းကာလဖြစ်တဲ့အတွက် စစ်ဘေးရှောင် ပြည်သူ တွေအနေနဲ့ တောတောင်တွေထဲ ခက်ခဲစွာ နေထိုင်နေကြရပြီး အရေးပေါ်စာနာထောက်ထားမှုဆိုင်ရာ အကူအညီများစွာ လိုအပ်နေကြောင်း သိရပါတယ်။

~~~~~~~~~~

ကိုထိုက်