ရန်ကုန်မြို့ စစ်ရေးပစ်မှတ် ၆ နေရာကို အဝေးထိန်းမိုင်းနဲ့ ဖောက်ခွဲတိုက်ခိုက်ခဲ့ကြောင်း ရန်ကုန်တိုင်း ပြည်သူ့တပ်မဟာက သတင်းထုတ်ပြန်ပါတယ်။

ဩဂုတ် ၂၉ ရက်၊ ည ၈ နာရီ ၅၆ မိနစ်မှာ တောင်ဥက္ကလာပရဲစခန်း၊ ည ၈ နာရီ ၅၇ မိနစ်မှာ ရန်ကင်းရဲစခန်း၊ ည ၈ နာရီ မိနစ် ၅၀မှာ အရှေ့ဒဂုံရဲစခန်းတို့ကို အဝေးထိန်းမိုင်းနဲ့ ဖောက်ခွဲ ခဲ့ကြောင်း သိရပါတယ်။

“ရန်ကင်းရဲစခန်းဆိုတာ ကျနော်တို့ ကလေးဆေးရုံနားက ရဲစခန်း။ လူတော့မထိဘူး။ အသံ တော်တော်ကျယ်တယ်။ တောင်ဥက္ကလာရဲစခန်းလည်း ပေါက်ကွဲသံပြင်းတယ်။ ပေါက်ပြီးတော့ စစ်ကားတွေ ရောက်လာတယ်။ ကံဘဲ့မှာ ဖြတ်လာတဲ့ကားတွေကို ပိတ်စစ်တယ်”လို့ ရန်ကင်းမြို့နေပြည်သူတစ်ဦး ကပြောပါတယ်။

ဩဂုတ် ၂၈ ရက်၊ ည ၉ နာရီ ၁၄ မိနစ်ကလည်း မြောက်ဒဂုံထွေအုပ်ရုံး၊ ည ၉ နာရီ ၁၉ မိနစ်မှာ ရွှေပေါက္ကံရဲစခန်းတို့ကို အဝေးထိန်းမိုင်းနဲ့ ဖောက်ခွဲခဲ့ပြီး ဩဂုတ် ၂၇ ရက်၊ ည ၇နာရီ ၉ မိနစ်မှာ  မင်္ဂလာဒုံမြို့ယ်၊ ပတ္တမြားမြို့သစ်၊ ပတ္တမြားလမ်းရှိ အမှတ်(၈)လုံခြုံရေး ရဲတပ်ဖွဲ့ခွဲတို့ကို အဝေးထိန်းမိုင်းနဲ့ တိုက်ခိုက်ခဲ့ကြောင်း ရန်ကုန်တိုင်း ပြည်သူ့တပ်မဟာ က ထုတ်ပြန်ပါတယ်။

အဲဒီတိုက်ခိုက်မှုတွေကို KMD 18 Hunter Unit ၊ Guardians UG ၊ ရန်ကုန်တိုင်းပြည်သူ့ တပ်မဟာနဲ့ KMD 18 Crow Squad တို့ လုပ်ဆောင်ခဲ့ခြင်းဖြစ်ပါတယ်။

~~~~~~~~~~

ကိုထိုက်