စစ်ကိုင်းတိုင်း၊ ‌ဝက်လက်မြို့နယ်အတွင်း ခရီးသွားပြည်သူတွေကို ဆက်ကြေးကောက်နေတဲ့ အကြမ်းဖက် စစ်တပ်ကို ဒရုန်းနဲ့ ဗုံးကြဲခဲ့ရာ စစ်သား ၂ ဦး သေဆုံးကြောင်း သိရပါတယ်။

ဝက်လက်မြို့နယ်၊ ရွာသာကြီးရွာမှာ တပ်စွဲထားတဲ့ အကြမ်းဖက် စစ်တပ်ဟာ ဩဂုတ် ၁၆ ရက်က ရွှေဘို-မန္တလေး ကားလမ်းမပေါ် ဖြတ်သန်းသွားလာနေတဲ့ ခရီးသွားပြည်သူတွေဆီက ဆက်ကြေးကောက်နေစဉ်  ဒေသတွင်း PDF တွေက ဒရုန်းနဲ့ဗုံး ၆ လုံး ကြဲချခဲ့ကြောင်း ဒေသတွင်းနွေဦးတော်လှန်ရေးစာမျက်နှာ Red Peacock က ဖော်ပြပါတယ်။

“ကျနော်တို့ဘက်ခြမ်းတွေမှာ အခုလို ကားလမ်းမပေါ်တက်ပြီး ကားတွေကိုတားပြီး ပိုက်ဆံတောင်းတာ စစ်သားတော်တော်များများ လုပ်ကြတာဆိုတော့ အစဉ်အလာလိုဖြစ်နေပြီ။ ကားလမ်းမပေါ်ရောက်တာနဲ့ ညနေအတွက် အရက်ဖိုး ရှာကြတာပေါ့။ လမ်းမပေါ်ရောက် လာတဲ့ စစ်သားတိုင်းကို လုပ်နေတာ။ ပိုက်ဆံတောင်းတာမပေးရင် ပစ်သတ်မှာလေ”လို့ ဝက်လက်မြို့ခံသတင်းရင်းမြစ်က ပြောပါတယ်။

အဲဒီတိုက်ခိုက်မှုကို ယူနီကွန်းပြောက်ကျားတပ်ဖွဲ့- Unicorn Guerilla Force၊ Royal Falcon၊ Phoenix (SGG)၊ Fight For Federal၊ စစ်ကိုင်းမြို့နယ် ပကဖ၊ စစ်ကိုင်းခရိုင် တပ်ရင်း(၇) နဲ့ မြင်းဖြူရှင် တပ်ဖွဲ့- ၂ ဂဠုန်မော်စီတုံးတပ်ဖွဲ့တို့ ပူးပေါင်းလုပ်ဆောင်ခဲ့ခြင်း ဖြစ်ပါတယ်။

~~~~~~~~~

ကိုဦး