မကွေးတိုင်း၊ ကမ္မမြို့ပေါ် ရဲစခန်းကို ဒေသတွင်း PDF မဟာမိတ်တပ်ဖွဲ့တွေ ပူးပေါင်းတိုက်ခိုက်ခဲ့ရာ ရဲ  ၂ ဦး ကျည်ထိမှန်ကာ လဲကျသွားကြောင်း သိရပါတယ်။

ဩဂုတ် ၉ ရက်၊ ညနေ ၄ နာရီ ၁၈ မိနစ်လောက်မှာ ကမ္မမြို့မရဲစခန်းရှေ့ ဘန်ကာကို ဒေသတွင်း PDF ၁၀ ဖွဲ့ ပူးပေါင်းကာ လျှပ်တစ်ပြက် ဝင်ရောက်တိုက်ခိုက်ခဲ့ခြင်းဖြစ်ကြောင်း အနောက်လွင်ပြင် LDF ကသတင်းထုတ်ပြန်ပါတယ်။

“ရဲစခန်းထဲတော့မဟုတ်ဘူး။ ရဲစခန်းရှေ့က ဘန်ကာမှာရှိတဲ့ ကောင်တွေကို သွားပစ်တာ။ ဘန်ကာက ၄ ခု ရှိတယ်။ အဲအထဲမှာ ကင်းစောင့်နေတဲ့ကောင်တွေကို ပစ်တာ။ ၂ ကောင် ကျည်ထိပြီး လဲသွားတာ မြင်ရတယ်”လို့ ကမ္မLPDFရဲဘော်တစ်ဦးကပြောပါတယ်

PDFတွေ ဝင်ရောက်ပစ်ခတ်ပြီး ပြန်လည်ဆုတ်ခွာစဉ် ရဲစခန်းထဲကနေ ပြန်လည်ပစ်ခတ်ကြောင်း ကမ္မမြို့ခံတစ်ဦးက ပြောပါတယ်။ “ရဲ ၂ ကောင်သေတယ်လို့ ရဲစခန်းထဲက သတင်းထွက်လာတယ်။ စစချင်း PDFတွေ ရုတ်တရက်ရောက် လာပြီး ဝုန်းဒိုင်းကြဲပစ်တော့ ဘန်ကာထဲက ကောင်တွေ ဘာမှ ပြန်မပစ်နိုင်ဘူး။PDF တွေ ပြန်ဆုတ်မှ ရဲစခန်းထဲကနေ ဟေ့ကောင်တွေဘာလုပ်နေလဲ ပစ်လေကွာလို့ အော်မှ ပစ်ကြတာ” လို့ သူကပြော ပါတယ်။

အဲဒီတိုက်ခိုက်မှုကို  အနောက်လွင်ပြင် LDF၊ ပခုက္ကူခရိုင်တပ်ရင်း ၁၃၊ ပခုက္ကူ ပ.က.ဖ တပ်ရင်း ၁ တပ်ခွဲ ၁၊ Kamma Underground PDF၊ မြိုင် ပ.က.ဖ တပ်ရင်း ၁ တပ်ခွဲ ၂ ဂဠုန်ပြည်သူ့ကာကွယ်ရေး တပ်ဖွဲ၊ Scorpion People Defense Force – Myaing၊Myaing Underground PDF၊ တော်ဝင်ကျား၊ BLY ပကဖနဲ့ ဧရာအနောက်ပြောက်ကျားတပ်တို့ ပူးပေါင်းလုပ်ဆောင်ခြင်းဖြစ်ပြီး PDFရဲဘော်တွေ အထိအခိုက်မရှိဘူးလို့သိရပါတယ်။

˜˜˜˜

နိုင်ကြီး