စစ်ကောင်စီကားတစ်စီးကို တနင်္သာရီ-ဘုတ်ပြင်းလမ်းမှာ ပြည်သူ့ကာကွယ်ရေးပူးပေါင်းတပ်က ကြားဖြတ်တိုက်ခိုက်ခဲ့တယ်လို့ မြိတ်ခရိုင်တပ်ရင်း-၂ တပ်ခွဲ(၂)က သတင်းထုတ်ပြန်ပါတယ်။

မနေ့က ညသန်းခေါင်ကျော် ၁ နာရီခွဲလောက်မှာ တနင်္သာရီ-ဘုတ်ပြင်းလမ်းအတိုင်း ဆင်းလာတဲ့ စစ်ကောင်စီကားကို လယ်တောင်ယာရွာအနီးအရောက်မှာ တိုက်ခိုက်ခဲ့တာပါ။

"သူတို့လာတာအင်အား ၆၀ လောက် ရှိပါတယ်။ မိုင်းဆွဲတာတော့ မဟုတ်ဘူး။ ပြောက်ကျား တိုက်ခိုက်တာပါ" လို့ မြိတ်ခရိုင်တပ်ရင်း-၂တပ်ခွဲ(၂)ရဲ့ ပြန်ကြားရေးတာဝန်ခံက ပြောပါတယ်။

အပြန်အလှန် ပစ်ခတ်မှု နာရီဝက်ခန့် ကြာခဲ့ပြီး စစ်ကောင်စီဘက်က ထိခိုက်မှုကိုတော့ အတိအကျမသိရသေးဘူးလို့ ဆိုပါတယ်။ 

ပစ်ခတ်မှုဖြစ်ပွားပြီးနောက် ပြည်သူ့ကာကွယ်ရေးတပ်တွေဘက်ကလည်း အောင်အောင်မြင်မြင် ဆုတ်ခွာနိုင်ခဲ့တယ်လို့ သိရပါတယ်။

စစ်ကောင်စီဘက်ကလည်း တနင်္သာရီအခြေစိုက် ခမရ (၅၅၈) တပ်ရင်းထဲကို ပြန်လည်ဆုတ်ခွာသွားတယ်လို့ သိရပါတယ်။

အခုတိုက်ခိုက်မှုကို မြိတ်ခရိုင် တပ်ရင်း-၂ တပ်ခွဲ(၂)၊ တနင်္သာရီ ပြည်သူ့ကာကွယ်ရေးအဖွဲ့ (ပကဖ)နဲ့ ကျွန်းစုမြို့နယ် ပြည်သူ့ကာကွယ်ရေးအဖွဲ့ (ပကဖ)တို့ ပူးပေါင်းလုပ်ဆောင်ခဲ့တာဖြစ်ပါတယ်။

တနင်္သာရီမြို့နယ်မှာ ပြီးခဲ့တဲ့လ နောက်ဆုံးပတ်ကစလို့ တနင်္သာရီ အဓိကလမ်းမကြီးနဲ့ မောတောင်မြို့ကိုသွားတဲ့ လမ်းပိုင်းတွေမှာ စစ်ကောင်စီတပ်သားတွေ ဆက်တိုက်ဆိုသလို ကြားဖြတ် တိုက်ခိုက်ခံနေရပါတယ်။

ပြည်သူ့ကာကွယ်ရေးတပ်တွေဘက်ကတော့ တနင်္သာရီမြို့နယ်အတွင်းက လမ်းမကြီးနဲ့ တနင်္သာရီမောတောင်လမ်းပိုင်းကို ခရီးသွားလာခွင့်ပိတ်ထားပါတယ်။

------------ 

နှင်းမြ

#ငွေမောင်းသံ မီဒီယာ

နှင်းမြ